“Apple” korporasiyası süni intellekt elementləri ilə təchiz olunmuş üç innovativ daşına bilən cihazın hazırlanmasını sürətləndirir. “Bloomberg”in məlumatına görə, bu cihazlara ağıllı eynəklər, kulon və yenilənmiş “AirPods” daxildir.
Mənbələrin bildirdiyinə görə, hər üç cihaz “Siri” səs köməkçisi ilə təchiz olunacaq. “Siri” vizual mühitə uyğunlaşa və tapşırıqları kontekstə uyğun şəkildə yerinə yetirə biləcək.
Ağıllı eynəklər, kulon və “AirPods” iPhone ekosisteminə inteqrasiya ediləcək və çoxfunksiyalı kameralarla təchiz olunacaq. Kulonu boyunda gəzdirmək və ya geyimə bərkitmək mümkün olacaq. “Apple” bu cihazları süni intellekti aparat həllərinə inteqrasiya etmək strategiyası çərçivəsində təqdim etməyi planlaşdırır. Ağıllı eynəklərin 2027-ci ildə buraxılması nəzərdə tutulur, “AirPods” və kulon isə artıq bu il satışa çıxa bilər.
Bildirilir ki, “AirPods” və kulon aşağı keyfiyyətli kameralara malik kompakt qurğular olacaq və onlar foto və video çəkiliş üçün deyil, süni intellekt funksiyaları üçün nəzərdə tutulacaq. Kulon smartfonun “vizual və audio sensoru” rolunu oynayaraq kameranın fasiləsiz işləməsini və Siri vasitəsilə əmrlər üçün mikrofonun aktiv qalmasını təmin edəcək.
“Apple” süni intellekt sahəsində mövqeyini gücləndirməyə və istifadəçiləri öz ekosistemində saxlamağa çalışır. Gələcəkdə qarşılıqlı əlaqələrin əhəmiyyətli hissəsinin məhz periferik qurğular vasitəsilə həyata keçiriləcəyi gözlənilir. Yeni məhsullar barədə xəbərlər fonunda “Apple” səhmləri müvəqqəti olaraq 2,7% artaraq 262,74 dollar səviyyəsinə yüksəlib.
