ABŞ-ın New York ştatına bağlı Boonville qəsəbəsində yerləşən kilsədə baş verən partlayış nəticəsində beş nəfər ağır yaralanıb.
Editor.az xəbər verir ki, hadisə ştatın şimalında yerləşən Oneida County ərazisində qeydə alınıb. State Route 12 magistral yolunun 4930-cu blokunda yerləşən Abundant Life Fellowship kilsəsində baş verən partlayış nəticəsində bina tamamilə dağılıb.
New York State Police tərəfindən yayılan açıqlamada bildirilir ki, hadisə ilə bağlı araşdırmalar davam etdirilir. Xəstəxana rəsmilərinin məlumatına görə, xəsarət alan beş nəfərin vəziyyəti ağır olsa da, hazırda stabildir.
Polisin açıqlamasına əsasən, partlayışdan əvvəl binanın daxilində güclü qaz qoxusu ilə bağlı məlumat daxil olub. İlkin ehtimallara görə, partlayışa məhz qaz sızması səbəb ola bilər.
//Gülnarə Abasova, Editor.az
