Peruda prezident vəzifəsini icra edən dövlət başçısına impiçment elan edilib...
Poliqon xəbər verir ki, Peru Konqresi prezident vəzifəsini icra edən Xose Xeri barəsində etimadsızlıq votumunun qəbul edilməsini təsdiqləyib. Qərar parlamentin rəsmi yayımında elan olunub və səsvermənin görüntüləri Konqresin YouTube kanalında yayımlanıb.
Səsvermənin nəticələrini açıqlayan parlament sədrinin səlahiyyətlərini icra edən Fernando Rospilyosi bildirib ki, Konqres sədri və respublika prezidentinin vəzifəsini icra edən Xose Xeri barəsində etimadsızlıq təklifləri təsdiqlənib.
Məlumata görə, etimadsızlıq təşəbbüsünün müzakirəyə çıxarılmasına 71 deputat lehinə səs verib, 18 parlament üzvü əleyhinə çıxıb, 4 qanunverici isə bitərəf qalıb. Qərarın qəbul edilməsi Xose Xerinin vəzifədən kənarlaşdırılması prosesini sürətləndirə bilər.
Prezidentin istefası tələbi onun Çinli sahibkarlarla keçirdiyi və rəsmi iş qrafikində göstərilməyən görüşlərlə əlaqələndirilir. Müxalifət nümayəndələri hesab edirlər ki, bu cür təmasların gizli saxlanılması şəffaflıq prinsiplərinə ziddir və dövlət başçısının fəaliyyətinə dair suallar yaradır.
Hazırda ölkədə siyasi vəziyyətin necə inkişaf edəcəyi və Konqresin növbəti addımlarının nə olacağı diqqətlə izlənilir. Analitiklər bildirirlər ki, qəbul edilən etimadsızlıq votumu Peruda siyasi gərginliyin daha da artmasına səbəb ola bilər.
Poliqon.info
