Nepalın Milli Məclisi Everest dağına dırmanmaq istəyənlər üçün ən azı 7 min metr hündürlükdə bir dağ təcrübəsinə sahib olma şərtini nəzərdə tutan qanun layihəsini təsdiqləyib.
Nepal Turizm Departamenti tərəfindən verilən məlumata görə, yeni qanunvericilik tənzimləməsi dağçılıq sektorunda təhlükəsizliyi artırmaq məqsədi daşıyır. Departamentin sözçüsü Himal Qautam layihənin bu həftə Milli Məclisdən keçdiyini və hazırda tətildə olan Nümayəndələr Palatasının təsdiqindən sonra Prezident Ram Çandra Poudelin imzası ilə qüvvəyə minəcəyini bildirib.
Qanun layihəsi təkcə təcrübə şərti ilə kifayətlənmir, həm də dağların təmiz saxlanılması və bələdçilərin sosial rifahının dəstəklənməsi üçün yeni tənzimləmələri ehtiva edir. Hazırda dağçılardan alınan 4 min dollarlıq zibil depoziti, dırmanışdan sonra ərazinin təmizlənməsinə dair müvafiq sənəd təqdim edildikdə geri qaytarılır.
Hər il 400-dən çox dağçı Everestin cənub marşrutu vasitəsilə zirvəyə çatmaq üçün icazə alır. Lakin təcrübəsiz dağçıların yaratdığı süni sıxlıq və növbələr ölümcül qəzalara səbəb ola bilir. Hökumət indiyədək təşkilati işlərdə təhlükəsizlik standartlarını aşağı salmaqda tənqid olunurdu.
Dağçılıq sektorunda islahat tərəfdarları da təcrübəsiz şəxslərin Everestə dırmanmasının qadağan edilməsini israrla tələb edirdilər. Bu yeni qərarın dağdakı insan tıxaclarını azaltması və riskləri minimuma endirməsi gözlənilir.
