Məlumat sızması riski səbəbindən qərar qəbul olunub, bəzi xidmətlərin bulud üzərindən işləməsi narahatlıq yaradıb...
Poliqon xəbər verir ki, Avropa Parlamenti deputatlara verilmiş korporativ planşetlərdə süni intellekt funksiyalarını təhlükəsizlik səbəbi ilə deaktiv edib. Bu barədə Euractiv nəşri deputatlara göndərilmiş elektron məktuba istinadən məlumat yayıb.
Məktubda bildirilir ki, qərar parlamentin kibertəhlükəsizlik və şəxsi məlumatların qorunması üzrə ixtisaslaşmış qruplarının tövsiyələrindən sonra qəbul edilib. Aparılan qiymətləndirmələr göstərib ki, bəzi süni intellekt funksiyaları yerli qurğuda icra oluna biləcək tapşırıqlar üçün bulud xidmətlərindən istifadə edir və bu zaman məlumatlar cihazdan kənara ötürülür. Bu isə potensial məlumat sızması və məxfilik risklərini artırır.
Qərara əsasən, deputatlar planşetlərdə quraşdırılmış və mətnlərin hazırlanmasına kömək edən, internet səhifələrinin məzmununu xülasə edən, eləcə də virtual köməkçi funksiyalarını yerinə yetirən daxili süni intellekt alətlərindən istifadə imkanını itiriblər. Parlament rəhbərliyi hesab edir ki, bu cür funksiyaların avtomatik şəkildə məlumatları xarici serverlərə göndərməsi qurumun daxili sənədlərinin və yazışmalarının təhlükəsizliyi baxımından əlavə risk yarada bilər.
Eyni zamanda, qərar yalnız qurğulara inteqrasiya olunmuş standart funksiyalara şamil edilir. Üçüncü tərəf tətbiqləri və digər proqram təminatı məhdudiyyətə məruz qalmayıb. Halbuki, həmin proqramlarda da süni intellekt əsaslı funksiyalar ola bilər. Euractiv qeyd edir ki, bu məsələ gələcəkdə əlavə müzakirə mövzusu ola bilər.
Müşahidəçilərin fikrincə, Avropa Parlamenti tərəfindən atılan bu addım Avropa İttifaqı institutlarında kibertəhlükəsizlik və məlumatların qorunması sahəsində yanaşmanın sərtləşdirildiyini göstərir. Xüsusilə son illərdə dövlət qurumlarına qarşı artan kiberhücumlar və məlumat sızması halları fonunda belə tədbirlər strateji əhəmiyyət daşıyır. Qərarın gələcəkdə digər Avropa qurumları üçün də presedent yarada biləcəyi istisna edilmir.
Poliqon.info
