Suriya kürdləri, ölkənin şimal-şərq bölgələrində qurduqları özünüidarə orqanlarının qorunması üçün mübarizə aparırlar.
Vətəninfo.az xəbər verir ki, bu barədə “Suriya Demokratik Qüvvələri” (SDQ) kürd koalisiyasının komandiri Məzlum Əbdi “Rudaw” telekanalına verdiyi müsahibədə məlumat verib.
Əbdi bildirib ki, kürdlərin əsas tələbi muxtariyyət hüququnun tanınmasıdır: “Adından asılı olmayaraq, biz muxtariyyət istəyirik. Kürdlərin yaşadıqları ərazini müstəqil şəkildə idarə etmələri bizim üçün vacibdir”, – deyə o vurğulayıb. Həmçinin, Əbdi Münhen Təhlükəsizlik Konfransında kürd məsələsini müzakirə etdiyini əlavə edib.
Suriya Demokratik Qüvvələrinin komandiri, Avropa Birliyinin bir çox nümayəndəsinin kürdlərin hüquqları və Suriyadakı bölgələrinin xüsusi statusunu dəstəklədiyini qeyd edib. “Hazırda Dəməşqdəki keçid hökuməti ilə kürd xalqının istəklərini həyata keçirəcək bir mexanizm üzərində dialoq aparırıq”, – deyə Əbdi bildirib.
13 fevralda Münhen Təhlükəsizlik Konfransında Suriya xarici işlər naziri Əsəd əl-Şeybaninin rəhbərlik etdiyi nümayəndə heyətinin tərkibində olan Məzlum Əbdi, ABŞ dövlət katibi Marko Rubio ilə kürd məsələsini müzakirə edib. Danışıqlar zamanı 29 yanvarda kürdlər və Suriya hakimiyyəti arasında imzalanmış müqavilənin həyata keçirilməsinin qarantı olaraq beynəlxalq güclərin rolunun müzakirə edildiyi bildirilib.
