Arıqlamaq məqsədilə geniş yayılan interval aclıq üsulunun effektivliyi ilə bağlı yeni elmi nəticələr ortaya çıxıb. AzPost xəbər verir ki, The Guardian nəşrinin yazdığına görə, bu üsul artıq çəkidən azad olmaq baxımından ənənəvi pəhrizlərdən daha üstün hesab edilmir.
Alimlər müxtəlif ölkələrdə aparılan 22 beynəlxalq tədqiqatın nəticələrini təhlil ediblər. Araşdırma zamanı artıq çəki və piylənmədən əziyyət çəkən insanların interval aclıq və klassik pəhrizlər zamanı təxminən eyni miqdarda çəki itirdiyi müəyyən olunub. Xüsusilə məşhur “5:2” pəhriz modelində insanlar həftənin 5 günü normal qidalanır, digər 2 gün isə gündəlik kalori qəbulunu 500–600 kilokaloriyə qədər azaldır.
Tədqiqatın nəticələrinə əsasən, interval aclıq tətbiq edən şəxslər orta hesabla bədən çəkisinin yalnız 3 faizini itirə biliblər. Bu göstərici isə həkimlərin klinik baxımdan əhəmiyyətli hesab etdiyi minimum 5 faiz həddindən xeyli aşağıdır. Bu səbəbdən mütəxəssislər bu üsulun arıqlama baxımından gözlənilən qədər təsirli olmadığını bildirirlər.
Araşdırmanın müəlliflərindən biri, italiyalı alim doktor Luis Qarenyani qeyd edib ki, interval aclıq möcüzəvi həll yolu hesab olunmamalıdır. Onun sözlərinə görə, bu metod klassik pəhrizlər qədər effektiv ola bilər, lakin onlardan daha üstün deyil. Eyni zamanda, bu üsulun digər pəhrizlərdən daha çox sağlamlıq faydası verdiyini sübut edən kifayət qədər elmi dəlil də tapılmayıb.
Araşdırmada ümumilikdə Avropa, Şimali Amerika, Çin, Avstraliya və Cənubi Amerikadan olan 1995 nəfər yetkin insan iştirak edib. Tədqiqatlar interval aclığın müxtəlif formalarını, o cümlədən gün aşırı aclıq, vaxt məhdudiyyətli qidalanma və “5:2” modelini əhatə edib.
Mütəxəssislər bildirirlər ki, interval aclıq bəzi hallarda insulin həssaslığını artırmaq, iltihabı azaltmaq və metabolizmi tənzimləmək kimi müsbət təsirlər göstərə bilər. Bununla belə, onun həyat keyfiyyətini və ümumi sağlamlığı digər pəhrizlərdən daha çox yaxşılaşdırdığını təsdiqləyən güclü sübutlar yoxdur.
Alimlər həmçinin qeyd edirlər ki, interval aclıq zamanı bəzi insanlar daha az fiziki aktiv olur, bu da arıqlama prosesini ləngidə bilər. Bundan əlavə, mövcud tədqiqatların əksəriyyəti qısamüddətli olub və uzunmüddətli təsirlərlə bağlı dəqiq nəticələr çıxarmaq çətindir.
Mütəxəssislərin fikrincə, arıqlamaq üçün ən effektiv yanaşma balanslı qidalanma, fiziki aktivlik və davamlı sağlam həyat tərzinin qorunmasıdır. Interval aclıq isə yalnız fərdi hallarda və mütəxəssis nəzarəti altında tətbiq edildikdə faydalı ola bilər.
