SDS komandanı Məzlum Abdi muxtariyyətin qorunmasını əsas şərt kimi irəli sürüb, məsələ Münhen Təhlükəsizlik Konfransında da müzakirə olunub...
Poliqon xəbər verir ki, Suriyanın şimal-şərq bölgələrində yaşayan kürdlərin əsas tələbi onların yaratdıqları özünüidarəetmə orqanlarının saxlanılmasıdır. Bu barədə Rudaw telekanalına müsahibəsində kürd koalisiyası olan Suriya Demokratik Qüvvələrinin komandanı Məzlum Abdi məlumat verib.
O bildirib ki, kürdlər üçün əsas məsələ muxtariyyətin hansı ad altında rəsmiləşdirilməsindən asılı olmayaraq, yaşadıqları əraziləri müstəqil şəkildə idarə etmək hüququnun təmin olunmasıdır.
“Biz istənilən ad altında muxtariyyət istəyirik, bizim üçün vacib olan kürdlərin yaşadıqları əraziləri özlərinin idarə etməsidir”, deyə hərbi rəhbər vurğulayıb.
Abdi qeyd edib ki, kürd məsələsini o, Münhen Təhlükəsizlik Konfransı çərçivəsində də müzakirə edib. Onun sözlərinə görə, Avropa İttifaqında bir çox dairələr Suriyada kürdlərin hüquqlarının və onların nəzarətində olan rayonların xüsusi statusunun qorunmasını dəstəkləyir.
SDS komandanı hazırda Dəməşqdə fəaliyyət göstərən keçid hökuməti ilə dialoq apardıqlarını bildirib. O deyib ki, tərəflər kürd xalqının istəklərinin reallaşdırılmasına imkan verəcək mexanizmin hazırlanması üzərində işləyirlər. Abdi əlavə edib ki, bu dialoq Suriyanın gələcək siyasi modelinin formalaşdırılması baxımından mühüm əhəmiyyət daşıyır.
Məzlum Abdi fevralın 13-də Münhendə keçirilən forum çərçivəsində Suriyanın xarici işlər naziri Asaad əş-Şeybaninin rəhbərlik etdiyi nümayəndə heyətinin tərkibində olub. Həmin heyət Marko Rubio ilə görüş keçirib. Onun sözlərinə görə, danışıqlarda yanvarın 29-da kürdlərlə Suriya hakimiyyəti arasında əldə olunmuş razılaşmanın icrasına beynəlxalq güclərin zəmanətçi kimi mümkün rolu da müzakirə edilib.
Abdi vurğulayıb ki, beynəlxalq aktorların prosesə cəlb olunması əldə olunan razılaşmaların davamlı və dayanıqlı olmasına töhfə verə bilər.
Poliqon.info
