Yuyulmasına baxmayaraq paltarlardan gələn nəm və kif qoxusu bir çox evdə rast gəlinən problemdir.
Pravda.az bildirir ki, bunun bir neçə əsas səbəbi var və düzgün yanaşma ilə bu problemin qarşısını almaq mümkündür.
Maşının həddindən artıq doldurulması
Paltaryuyan maşın normadan artıq yükləndikdə paltarlar tam yuyulmur. Parçalar arasında hava və su düzgün dövr etmədiyi üçün kir və bakteriyalar qalır, nəticədə xoşagəlməz qoxu yaranır.
Paltarların maşında saxlanılması
Yuma prosesi bitdikdən sonra paltarlar uzun müddət maşının içində qalarsa, rütubət bakteriyaların çoxalmasına şərait yaradır. Bu isə nəm qoxusuna səbəb olur. Paltarları proqram bitən kimi çıxarmaq tövsiyə edilir.
Maşının daxilinin çirkli olması
Filtr, rezin hissələr və baraban mütəmadi təmizlənmədikdə kif və bakteriya toplanır. Bu qoxu sonradan yuyulan paltarlara da keçir. Vaxtaşırı boş, yüksək temperaturda yuma proqramı işə salmaq və filtri təmizləmək məsləhətdir.
Yuma vasitəsinin düzgün istifadə olunmaması
Həddindən artıq və ya az miqdarda yuma vasitəsindən istifadə etmək paltarların yaxşı yuyulmamasına səbəb ola bilər. Artıq yuma vasitəsinin qalıqları da qoxu yarada bilər.
Düzgün qurudulmama
Paltarlar kifayət qədər qurudulmadıqda və ya rütubətli mühitdə saxlanıldıqda nəm qoxusu qalıcı ola bilər. Yaxşı havalanan yerdə və ya düzgün qurutma rejimində qurudulması vacibdir.
Əminə Bayramova
