ABŞ prezidenti milyardlarla dollarlıq bərpa layihəsini və BMT mandatlı sabitləşdirmə qüvvələrinin yaradılmasını elan etməyə hazırlaşır...
ABŞ Prezidenti Donald Tramp fevralın 19-da Vaşinqtonda keçiriləcək “Sülh Şurası”nın ilk rəsmi iclasında Qəzza zolağı ilə bağlı genişmiqyaslı təşəbbüslərini təqdim edəcək.
Poliqon xəbər verir ki, bu barədə “Reuters” Agentliyi iki yüksək vəzifəli, adının açıqlanmasını istəməyən ABŞ rəsmisinə istinadən məlumat yayıb.
Məlumata görə, Tramp iclas zamanı Qəzza sektorunun bərpası üçün milyardlarla dollar dəyərində layihə elan edəcək. Eyni zamanda, ABŞ prezidenti BMT mandatı əsasında fəaliyyət göstərəcək və anklavda sabitliyin təmin olunmasına yönələcək xüsusi beynəlxalq qüvvələrin yaradılması planından danışacaq.
Agentliyin mənbələri bildiriblər ki, Vaşinqtonda keçiriləcək ilk iclasda ən azı 20 ölkənin nümayəndə heyətləri iştirak edəcək. Lakin bərpa planının detalları və sabitləşdirmə qüvvələrinin strukturu barədə hələlik konkret məlumat açıqlanmayıb.
Xatırladaq ki, yanvarın 22-də “Sülh Şurası”nın nizamnaməsi 20 ölkənin nümayəndələri tərəfindən imzalanıb. Qurum ilkin mərhələdə İsrail ilə Fələstinin HƏMAS hərəkatı arasında atəşkəsə nəzarət etmək və Qəzza sektorunun bərpasını koordinasiya etmək məqsədilə yaradılıb. Daha sonra Donald Tramp təşkilatın səlahiyyətlərini genişləndirərək onu dünyanın digər münaqişə bölgələrində də fəaliyyət göstərə biləcək platformaya çevirdiyini bəyan edib.
Yanvarın sonunda “The New York Times” qəzeti yazıb ki, “Sülh Şurası” çərçivəsində Trampın səlahiyyətlərinə qətnamələrin təsdiqi və ya dayandırılması, yüksək vəzifəli şəxslərin, eləcə də beynəlxalq sabitləşdirmə qüvvələrinin komandanının təyin edilməsi daxil olacaq.
Ekspertlər hesab edirlər ki, Qəzza ilə bağlı yeni təşəbbüs Yaxın Şərqdə davam edən humanitar və təhlükəsizlik böhranının həlli istiqamətində mühüm addım ola bilər. Bununla belə, beynəlxalq ictimaiyyətin və region ölkələrinin bu təşəbbüsə münasibəti, eləcə də BMT mandatlı qüvvələrin formalaşdırılması prosesi layihənin gələcək taleyini müəyyən edəcək əsas amillərdən biri olacaq.
Poliqon.info
