Alimlər saç uzatma üçün istifadə olunan saç toxumalarında xərçəng və hormonal pozulma riskini artıran 169 kimyəvi maddə aşkarlayıb.
Redaktor.az xəbər verir ki, bu barədə "Environment & Health" jurnalında dərc olunan araşdırmada bildirilib.
ABŞ-nin Silent Spring Institute institutundan olan tədqiqatçılar 43 populyar saç artırma məhsulunu həm sintetik, həm də təbii materiallardan, o cümlədən insan saçlarından hazırlananları analiz ediblər. Yüksək dəqiqlikli kimyəvi analiz nəticəsində 900-dən çox kimyəvi “imza” müəyyən edilib və 169 müxtəlif təhlükəli maddə aşkar olunub.
Araşdırma göstərib ki, nümunələrin əksəriyyətində xərçəng, hormonal pozulmalar, inkişaf problemləri və immun sistemi üzərində mənfi təsirlərlə əlaqələndirilən maddələr mövcuddur. Aşkarlanan maddələr arasında antipirenlər, ftalatlar, pestisidlər, stiren və organotinlər var. Xüsusilə organotinlər tədqiqatçıları təəccübləndirib; onlar plastik sabitləşdirici kimi istifadə olunur, dəriyə zərər verə və hormonal balansı poza bilər. 36 nümunədə isə əvvəlki araşdırmalarda süd vəzi xərçəngi riskini artıran maddələr tapılıb.
Tədqiqatçılar bildiriblər ki, süni saç toxumaları həftələrlə taxılır və uzun müddət baş dərisi və boyun ilə təmasda olur. Termoforma zamanı isə bu maddələr havaya da yayıla bilər. Bununla belə, istehsalçılar məhsulların tam tərkibini açıqlamalı deyillər.
Alimlər nəticələrin istehlakçıların mümkün riskləri daha yaxşı qiymətləndirməsi üçün daha sərt nəzarət və məhsul tərkibinin tam açıqlanmasının vacibliyini göstərdiyini vurğulayıblar.
Nuriyyə NATİQQIZI
