Olaylar.az xəbər verir ki, bu barədə Avropa Komissiyasının yaydığı məlumatda bildirilib. Sənəd Avropa İttifaqında bədniyyətli pilotsuz uçuş aparatlarından (PUA) irəli gələn təhdidlərə qarşı vahid yanaşmanın formalaşdırılmasını hədəfləyir.
Fəaliyyət Planı milli təşəbbüsləri tamamlayan, əlaqələndirilmiş tədbirlər vasitəsilə üzv dövlətlərə dəstək göstərilməsini nəzərdə tutur. Sənəddə əsas prioritetlər kimi təhdidlərə hazırlıq səviyyəsinin artırılması, dronların aşkarlanması imkanlarının genişləndirilməsi, cavab tədbirlərinin koordinasiyası və Avropa İttifaqının müdafiə hazırlığının gücləndirilməsi göstərilir.
Plan çərçivəsində Avropanın müdafiə qabiliyyətinin innovasiyalar və sənaye əməkdaşlığı yolu ilə möhkəmləndirilməsinə xüsusi diqqət ayrılıb. Avropa Komissiyası hökumətlərlə sənaye arasında əməkdaşlığı gücləndirməklə, o cümlədən Ukrayna ilə Drone Alliance çərçivəsində daha dayanıqlı pilotsuz texnologiyalar ekosisteminin formalaşdırılmasını təşviq etməyi planlaşdırır. Münasib qiymətə müdafiə texnologiyalarının sürətlə hazırlanması və kütləvi istehsalın sürətləndirilməsi Avropanın dronlara qarşı müdafiə təşəbbüsünün, eləcə də Müdafiə Hazırlığı üzrə 2030 Yol Xəritəsi çərçivəsində təklif olunan flaqman layihə - Eastern Flank Watch təşəbbüsünün əsasını təşkil edəcək.
Məlumatda qeyd olunur ki, Aİ-nin maliyyə proqramları artıq pilotsuz uçuş aparatları və onlara qarşı mübarizə texnologiyalarının inkişafını dəstəkləyir. Bu dəstək əsasən Horizon Europe, Avropa Müdafiə Fondu, Avropa müdafiə sənayesinin inkişaf proqramı və SAFE kreditləri vasitəsilə həyata keçirilir. Komissiya bu maliyyə alətləri vasitəsilə üzv dövlətlərə dəstəyi davam etdirməyi planlaşdırır.
Növbəti mərhələdə Avropa Komissiyası təklif olunan tədbirlər və prioritetlər üzrə üzv dövlətlərlə müzakirələrə başlayacaq. Bu proses "birgə məsuliyyət" prinsipi əsasında aparılacaq və sənaye ilə, eləcə də Avropa Parlamenti ilə sıx əməkdaşlıq nəzərdə tutulur. Planın icrasının əlaqələndirilməsi məqsədilə üzv dövlətlərin iştirakı ilə strateji mexanizmin yaradılması da mümkün hesab olunur.
Bundan əlavə, Avropa Komissiyası üzv dövlətlərə dron təhlükəsizliyi üzrə milli koordinatorların təyin edilməsini təklif edib. Bu koordinatorlar Fəaliyyət Planında nəzərdə tutulan tədbirlərin milli səviyyədə icrasına və nəzarətinə cavabdeh olacaqlar.
