Poliqon xəbər verir ki, ABŞ prezidenti Donald Tramp Axios nəşrinə müsahibəsində Vaşinqtonun İrana doğru ikinci aviadaşıyıcı qrup göndərmək imkanını nəzərdən keçirdiyini bildirib. Ağ evin rəhbəri qeyd edib ki, artıq region istiqamətində iri hərbi qüvvələr hərəkət edir və bu proses genişləndirilə bilər.
“Oraya bir armada yönəlir və ola bilsin ki, daha biri də göndərilsin”, deyə Tramp bildirib.
Onun sözlərinə görə, hazırda İrana doğru ikinci aviadaşıyıcı qrupun göndərilməsi məsələsi üzərində düşünülür. Bu açıqlama Yaxın Şərqdə gərginliyin artdığı, xüsusilə İran, İsrail və ABŞ arasında qarşıdurma risklərinin yüksəldiyi bir dövrə təsadüf edir.
Bundan əvvəl yayılan məlumatlarda bildirilirdi ki, İran hakimiyyəti İsrail və ABŞ tərəfindən mümkün hərbi addımlara qarşı hazırlıq vəziyyətindədir. Tehran regionda baş verə biləcək eskalasiyanı diqqətlə izləyir və cavab tədbirləri planlaşdırır.
Fevralın 9-da The Jerusalem Post qəzeti yazıb ki, İsrail ABŞ-ni xəbərdar edərək, İran “qırmızı xətləri” keçəcəyi təqdirdə, raket proqramına aid obyektlərə qarşı müstəqil şəkildə zərbələr endirməyə hazır olduğunu bildirib. İsrail tərəfinin fikrincə, hazırda İranın raket infrastrukturuna ciddi ziyan vurmaq üçün “tarixi məqam” yetişib.
Fevralın 7-də isə İranın xarici işlər naziri Abbas Əraqçi bəyan edib ki, hər hansı hücum olacağı təqdirdə Tehran ABŞ-nin Fars körfəzindəki bazalarına zərbələr endirməyə hazırdır. Nazir vurğulayıb ki, İran öz raket proqramını nə indi, nə də gələcəkdə müzakirə mövzusu etməyi planlaşdırır və bu məsələ ölkənin milli müdafiəsinə birbaşa aiddir.
Poliqon.info
