Nyu-York meri Zohran Mamdani şəhər daxilində yanvar ayının sonlarından etibarən təsirli olan hədsiz soyuqlar nəticəsində 18 nəfərin həyatını itirdiyini açıqlayıb.
Nyu-York meri Zohran Mamdani verdiyi bəyanatda qar yağışı və kəskin şaxta səbəbindən həftəsonu daha bir nəfərin vəfat etdiyini bildirib. Mamdani yanvarın sonundan bəri hava temperaturunun 13 gün boyunca sıfır dərəcə və ya daha aşağı müşahidə olunduğu Nyu-Yorkda ümumilikdə 18 nəfərin hədsiz soyuqdan öldüyünü qeyd edib.
"İtirilən hər bir həyat bir faciədir", - deyən mer qeyd edib ki, bu, son 60 ilin ən uzunmüddətli şaxtalı hava dalğalarından biridir. Hətta şəhərin bəzi bölgələrində temperaturun Antarktidanın bəzi hissələrindən daha aşağı olduğu bildirilir.
Evsizlər üçün təcili tədbirlər
19 yanvar tarixindən etibarən şəhərdə "Code Blue" (Fövqəladə Soyuq Hava) rejimi elan edilib. Bu müddət ərzində Nyu-Yorkda 1400-dən çox evsiz şəxs sığınacaqlara yerləşdirilib. Şəhər rəhbərliyi sığınacaq potensialını artırmaq üçün əlavə mehmanxana otaqları ayırıb və küçələrdə isitmə xidməti göstərən 33 xüsusi avtobus yerləşdirib.
Merin sözlərinə görə, ölənlərin ən azı 10-u küçədə tapılıb. İlkin tibbi rəylər 13 nəfərin birbaşa hipotermiya (donma) səbəbindən öldüyünü göstərir. Mamdani sakinləri ehtiyatlı olmağa, qonşularına nəzarət etməyə və ehtiyacı olan şəxsləri gördükdə dərhal 311 xidmətinə məlumat verməyə çağırıb.
