İran və onunla əlaqəli Qəzza zolağı və Livandakı silahlı qrupların mümkün cavab addımları ilə bağlı artan narahatlıqlar fonunda İsrail ordusu yüksək vəzifəli zabitlərin təhlükəsizliyinə cavabdeh olan Baş Qərargah bölməsinin heyətini əhəmiyyətli dərəcədə artırır.
KONKRET.az xəbər verir ki, məlumata görə, əməliyyat şöbəsində qəbul edilən qərara əsasən, mühafizə bölməsinin şəxsi heyətinin sayı bir neçə dəfə artırılacaq.
Həmçinin ilk dəfə olaraq bu istiqamətdə genişmiqyaslı şəkildə daimi ştat əməkdaşlarının işə qəbulu aparılır. Məqsəd həm ölkə daxilində, həm də xarici səfərlər zamanı israilli yüksək rütbəli hərbçilərin və hərbi nümayəndə heyətlərinin təhlükəsizliyini gücləndirməkdir.
İsrail ordusunun yüksək vəzifəli nümayəndələrindən biri vəziyyəti şərh edərkən bildirib:
“Biz düşmənlərimizə qarşı yüz il yetəcək ‘qisas batareyası’nı doldurmuşuq.”
Bu ifadə təhlükəsizlik tədbirlərinin uzunmüddətli perspektiv üçün nəzərdə tutulduğunu göstərir.
Mənbələr onu da qeyd edir ki, bəzi yüksək rütbəli zabitlər ordudan istefa verdikdən sonra belə mühafizə altında qalacaqlar. Bu addımın, son aylarda regionda baş verən hədəfli əməliyyatlar və qarşılıqlı təhdidlərin artması ilə əlaqədar atıldığı bildirilir.
Ekspertlər hesab edirlər ki, bu qərar İsrailin təhlükəsizlik doktrinasında fərdi hərbi rəhbərliyin qorunmasına verilən əhəmiyyətin daha da artdığını nümayiş etdirir. Bunun eyni zamanda, xaricdə mümkün hücum risklərinə qarşı qabaqlayıcı tədbir kimi qiymətləndirildiyi vurğulanır.
Müşviq Tofiqoğlu
KONKRET.az
