Diplomatik danışıqların perspektivlərinin pisləşməsi fonunda Vaşinqtonda hərbi ssenari gündəmə gəlir...
Poliqon xəbər verir ki, ABŞ prezidenti Donald Tramp İrana qarşı hərbi əməliyyatın başlanmasına meyllənə bilər. Reuters Agentliyinin Ağ Evə yaxın mənbələrə istinadla yaydığı məlumata görə, Tramp hazırda bu variantı daha ciddi şəkildə nəzərdən keçirir və buna səbəb Vaşinqtonla Tehran arasında ziddiyyətlərin diplomatik yolla həllinin getdikcə çətinləşməsidir.
Mənbələrin bildirdiyinə görə, ABŞ administrasiyasında İranla danışıqların real nəticə verəcəyinə dair nikbinlik zəifləyib. Bu fonda Trampın milli təhlükəsizlik komandası müxtəlif ssenariləri, o cümlədən məhdud və ya genişmiqyaslı hərbi əməliyyat imkanlarını qiymətləndirir.
Bundan az əvvəl məlum olub ki, ABŞ və İran arasında cümə gününə planlaşdırılan danışıqlar baş tutmaya bilər. Axios portalının yazdığına görə, Tehran görüş yerinin Türkiyədən Omana köçürülməsini təklif etsə də, Vaşinqton bu tələbi nəzərdən keçirərək rədd edib. ABŞ tərəfi yerin dəyişdirilməsinin danışıqlar prosesinə müsbət təsir göstərəcəyinə inanmadığını bildirib. Nəticədə tərəflər arasında diplomatik təmasların dalana dirənməsi riski artıb.
Gərginliyin artdığını göstərən daha bir hadisə 4 fevralda baş verib. ABŞ Silahlı Qüvvələrinin Mərkəzi Komandanlığının (CENTCOM) rəsmi nümayəndəsi, kapitan Tim Hokinsin açıqlamasına görə, ABŞ Hərbi Hava Qüvvələrinə məxsus F-35C qırıcısı İranın “Şahid-139” tipli pilotsuz uçuş aparatını vurub. Bildirilib ki, dron ABŞ Hərbi Dəniz Qüvvələrinin USS Abraham Lincoln aviadaşıyıcısına təhlükəli şəkildə yaxınlaşdıqdan sonra məhv edilib.
Analitiklər hesab edirlər ki, bu cür insidentlər ABŞ-İran münasibətlərində eskalasiyanın dərinləşməsi riskini artırır və Tramp administrasiyasının hərbi variantı daha real alternativ kimi gündəmdə saxlamasına səbəb olur. Eyni zamanda vurğulanır ki, mümkün əməliyyatın miqyası və forması İranın növbəti addımlarından və beynəlxalq reaksiyadan ciddi şəkildə asılı olacaq.
Poliqon.info
