Qış aylarında bir çox insan gecələr ayaqlarının üşüməsi səbəbindən yuxuya getməkdə çətinlik çəkir.
Pravda.az bildirir ki, soyuq ayaqlar bədənin istilik balansını poza və yuxu prosesini gecikdirə bilər.
Araşdırmalara görə, ayaqların kifayət qədər isinməməsi bədənin rahatlama mexanizmini zəiflədir. Bu isə insanın yataqda daha uzun müddət oyaq qalmasına səbəb olur. Xüsusilə qan dövranı zəif olan şəxslər bu problemlə daha tez-tez qarşılaşır.
Mütəxəssislər problemin həlli üçün sadə, lakin effektiv üsul tövsiyə edirlər:
Yatmazdan əvvəl yorğanın altına isti bir əşya qoymaq ayaqların tez isinməsinə kömək edir. Bu məqsədlə isti su şüşəsi, əvvəlcədən qızdırılmış xüsusi torbalar və ya ayaq isitmə vasitələrindən istifadə oluna bilər.
Ayaqların isinməsi bədənə rahatlıq siqnalı göndərir, qan dövranını sürətləndirir və yuxuya keçidi asanlaşdırır. Nəticədə insan daha tez yuxuya gedir və gecə yuxusunun keyfiyyəti yüksəlir.
Mütəxəssislər eyni zamanda təhlükəsizlik qaydalarına diqqət yetirilməsinin vacibliyini vurğulayır. İsti əşyalar birbaşa dəri ilə təmasda olmamalı, yanıq riskinin qarşısı alınmalıdır.
Əminə Bayramova
