Bu gün Əbu-Dabidə Azərbaycan Respublikasının Prezidenti İlham Əliyevin Ermənistan Respublikasının Baş naziri Nikol Paşinyan ilə geniş tərkibdə görüşü keçirilib.
Missiya.Az xəbər verir ki, bu barədə deputat Vüqar Bayramov feysbuk hesabında paylaşım edib.
"Prezident İlham Əliyevin rəhbərliyi ilə Azərbaycan artıq "orta güc" dövlətinə çevrilərək regional düzəni müəyyənləşdirən əsas ölkələrdəndir. Azərbaycan həmçinin sülh gündəliyinin irəlilədilməsi istiqamətində səylərini inamla davam etdirir. Azərbaycan üzərindən Ermənistana yüklərin daşınması ilə bağlı bütün məhdudiyyətlərin aradan qaldırılması və benzin ixracatının həyata keçirilməsi də məhz dayanıqlı sülhə xidmət edən addımlardır. Hazırda 16 ölkəyə təbii qaz nəql edən Azərbaycan bütövlükdə regionun enerji təhlükəsizliyinə xüsusi dəstək nümayiş etdirir",-deputat bildirib.
Vüqar Bayramovun sözlərinə görə, Azərbaycan və Ermənistan arasında iqtisadi əlaqələrin və eləcə də kommunikasiyaların yenidən bərpası məhz regionda sülhün möhkəmlənməsinə xidmət etmiş olacaq. Azərbaycanın əsas hissəsi ilə Naxçıvanı birləşdirəcək Zəngəzur dəhlizi isə regionun inkişafı üçün yeni imkanlar yaradacaq.
"İlkin qiymətləndirmələr göstərir ki, sülh müqaviləsinin imzalanmasından sonra Azərbaycan ilə Ermənistan arasında 38 məhsul üzrə qarşılıqlı ticarətin qurulması mümkündür. Bura enerji və eləcə qeyri neft-qaz məhsulları daxildir. Həmin məhsullar üzrə ölkələr arasında müqayisəli üstünlüklər var. Sülh müqaviləsi imzalanarsa və ticari əlaqələr bərpa edilərsə Azərbaycan ilə Ermənistan arasında illik 300 milyon dollarlıq ticarət dövriyyəsi formalaşa bilər. Təbii ki, bütün bunlar birmənalı şəkildə Ermənistanın sülhə necə sadiq qalacağından asılı olacaq. Azərbaycan regionda dayanıqlı sülhdə maraqlı olmaqla yanaşı, hər zaman milli maraqlarını qorumaq gücündədir",- V.Bayramov əlavə edib.
İlahə Qənbərli
Missiya.Az
