Hər ayın ilk çərşənbə günü Böyük Britaniyanın tanınmış aşpazları ilə müsahibə aparılır, onların ucuz yemək üsulları, qida sənayesi ilə bağlı fikirləri və şəxsi təcrübələri öyrənilir. Bu dəfə müsahibənin qonağı televiziya tamaşaçılarına yaxşı tanış olan, “Rockfish” restoranlar şəbəkəsinin qurucusu və icraçı direktoru Mitç Tonks olub.
Məşhur aşpaz konservləşdirilmiş dəniz məhsullarını “zaman kapsulu” adlandıraraq onların həm uzunömürlü, həm də dad baxımından zəngin olduğunu bildirib. Onun sözlərinə görə, büdcəyə uyğun və tez hazırlanan yeməklər arasında konservləşdirilmiş sardina ilə pomidor və taqlatelli pastası xüsusi yer tutur. “Az sayda inqrediyentlə qısa vaxtda çox ləzzətli yemək hazırlamaq mümkündür,” – deyə Tonks qeyd edib.
Aşpazın sevimli reseptlərindən biri də konservləşdirilmiş skumbriya ilə hazırlanmış “şavarma”dır. Reseptə görə, kələm, qırmızı soğan və yaşıl acı bibər doğranaraq qarışdırılır, yoqurta sarımsaq sürtülür və hamısı birlikdə qarışdırılır. Un lavaşının üzərinə humus çəkilir, tərəvəz qarışığı və skumbriya əlavə olunur, üzərinə zaatar və ya zirə səpilir, limon sıxılır və bükülərək şavarma formasında təqdim edilir.
Mitç Tonks dəniz məhsulları baxımından dünyanın ən yaxşı bölgəsi kimi Şimali İspaniyanı göstərib. Onun sözlərinə görə, sidreriyalarda (sidr barlarında) formalaşmış yemək mədəniyyəti onu xüsusilə ilhamlandırır və bu üslub Salcombe və Lyme Regis şəhərlərində açılan yeni “Rockfish” restoranlarının interyer dizaynına da təsir edib. Aşpaz həmçinin Portuqaliyanın Porto şəhərini də xüsusi vurğulayaraq, burada dəniz məhsullarının açıq havada, kömür üzərində bişirilməsini və sadə şəkildə təqdim olunmasını çox sevdiyini bildirib.
25 illik dəniz məhsulları təcrübəsinə malik aşpaz Brexit-in Böyük Britaniya balıqçılığına ciddi zərər vurduğunu deyib. Onun fikrincə, britaniyalı balıqçılar əsas 12 millik zonalara çıxış imkanlarını itirib, eyni zamanda fransız balıqçı gəmiləri geniş hüquqlarla ölkə sularında fəaliyyətlərini davam etdirirlər. Avropaya ixracın isə bahalaşması və bürokratik maneələrin artması vəziyyəti daha da çətinləşdirib.
Mitç Tonks problemin əsas səbəblərindən birinin britaniyalıların öz balıqlarını kifayət qədər istehlak etməməsi olduğunu vurğulayıb:
“Biz tutduğumuz balığın böyük hissəsini Avropaya satmağa möhtac olduqca, həmişə zəif mövqedə qalacağıq. Çıxış yolu sadədir – öz sularımızda tutulan balıq növlərini daha çox yeməyə başlamalıyıq.”
