Kiyevdə səfərdə olan NATO Baş katibi Mark Rutte Ukrayna Parlamentində çıxış edərək Alyansın Ukraynaya dəstəyini bir daha təsdiqləyib.
Rutte çıxışında Rusiya Prezidenti Vladimir Putinin Ukraynanı zamanla sarsıda biləcəyini düşündüyünü bildirib. Onun sözlərinə görə, Putin Ukraynanın zəif olduğunu, tərəfdaşlarının yorulacağını və dəstək iradəsinin sarsılacağını hesab edirdi.
“Lakin bu, böyük bir yanılma idi. Ukrayna güclüdür və bizim dəstəyimiz sarsılmazdır”, – deyə Rutte vurğulayıb.
Ukraynanın yalnız güclü silahlı qüvvələrə deyil, eyni zamanda etibarlı təhlükəsizlik zəmanətlərinə ehtiyacı olduğunu xatırladan NATO Baş katibi bildirib ki, ABŞ, Avropa və Kanada Ukraynanın Rusiya ilə davamlı sülh qura bilməsi üçün lazım olan təminatları verməyə hazır olduqlarını təsdiqləyiblər.
Rutte qeyd edib ki, “Könüllülər Koalisiyası”na üzv ölkələr bu zəmanətlər istiqamətində ümidverici irəliləyiş əldə ediblər. Onun sözlərinə görə, bəzi Avropa müttəfiqləri sülh razılaşmasından sonra Ukraynaya hərbi kontingent yerləşdirəcəklərini açıqlayıb.
“Quruda əsgərlər, havada döyüş təyyarələri, Qara dənizdə isə gəmilər olacaq”, – deyə o bildirib.
Rutte ABŞ-nin də arxa planda təhlükəsizlik zəmanətlərini təmin edəcəyini, digər müttəfiqlərin isə Ukraynaya müxtəlif formalarda dəstək verməyi öhdələrinə götürdüyünü qeyd edib.
“Təhlükəsizlik zəmanətləri möhkəmdir və bu, həyati əhəmiyyət daşıyır”, – deyən Rutte, müharibəni bitirəcək razılaşmaya nail olmağın çətin qərarlar tələb etdiyini vurğulayıb.
