Bakı Apellyasiya Məhkəməsində qəsdən sağlamlığa yüngül zərər vurmada təqsirləndirilən Abuzər Ənvərovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Murad Məmmədovun sədrliyi ilə keçirilən prosesdə qərar elan olunub.
Qərara əsasən, apellyasiya şikayətləri təmin edilməyib, Sabunçu Rayon Məhkəməsinin hökmü ləğv olunub. Təqsirləndirilən şəxsin barəsində “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci və 5.3-cü bəndləri tətbiq edilməklə cinayət təqibinə xitam verilib və Abuzər Ənvərov cinayət məsuliyyətindən azad edilib.
İttiham aktına görə, 1989-cu il təvəllüdlü Abuzər Ənvərov 09 noyabr 2025-ci il tarixdə, saat 05 radələrində qeyri-rəsmi münasibətdə olduğu Damla Ələkbərovanın (adı, soyadı şərtidir) yaşadığı Bakı şəhəri, Sabunçu rayonu ərazisində yerləşən nömrəsiz fərdi yaşayış evinin həyətində qısqanclıq zəminində yaranmış mübahisə zamanı zorakı hərəkətlərə yol verib.
İstintaqla müəyyən edilib ki, aralarında yaranan mübahisə zamanı təqsirləndirilən şəxs zərərçəkmiş şəxsin boğaz nahiyəsindən tutaraq onu sıxıb, daha sonra əli ilə sağ üz nahiyəsinə şillə ilə vurub. Nəticədə Abuzər Damlaya sağ göz almasının ağlı qişasında qansızma, sağ gözyuvası ətrafı nahiyədə şişkinlik və qançır, sol bazu nahiyəsində qançır, həmçinin sağ yanaq və boyun nahiyələrində sıyrıqlar şəklində xəsarətlər yetirib.
Məhkəmə-tibbi ekspertizanın rəyinə əsasən, qeyd olunan xəsarətlər dərəcəsinə görə sağlamlığın qısa müddətə pozulmasına səbəb olan qəsdən sağlamlığa yüngül zərər vurma kimi qiymətləndirilib.
Sabunçu Rayon Məhkəməsinin hökmü ilə təqsirləndirilən şəxs Cinayət Məcəlləsinin 128-ci maddəsi ilə təqsirli bilinib. Ona 1000 manat məbləğində cərimə cəzası təyin edilib. Qeyd olunan hökmdən narazı qalan Abuzər Ənvərov apellyasiya şikayəti verərək, barəsində bəraət hökmünün çıxarılmasını xahiş etmişdi.
Kamal Məmmədov
