Amerikalı biznesmen Ceffri Epşteynin yetkinlik yaşına çatmayanlara qarşı cinsi istismar ittihamları ilə bağlı yaxın vaxtlarda dərc olunan sənədlərdə onun ABŞ-a Məkkədəki Kəbəni örtən müqəddəs parça — “kisvə”dən fraqmentlər göndərilməsi barədə yazışmalar yer alıb.
Bizim.Media xəbər verir ki, bu barədə The Middle East Eye nəşri məlumat yayıb.
2017-ci ilin fevral–mart aylarına aid elektron yazışmalar BƏƏ-li biznes-leydi Əzizə əl-Əhmədinin Abdullah əl-Maari adlı şəxs ilə birlikdə kisvədən üç fraqmentin Epşteynə göndərilməsini təşkil etdiyini göstərir.
Elektron yazışmalara əsasən, kisvə fraqmentləri hava yolu ilə Səudiyyə Ərəbistanından ABŞ-ın Florida ştatına göndərilib. Mesajlarda üç ayrı parça təsvir olunur: biri Kəbənin daxili hissəsindən, digəri onun xarici örtüyündən, üçüncüsü isə eyni materialdan hazırlanmış, lakin istifadə olunmamış fraqmentdir. İstifadə olunmamış parça sənədlərdə “incəsənət əsəri” kimi təsnif edilib.
Göndəriş 2017-ci ilin mart ayında, Epşteynin yetkinlik yaşına çatmayanlara qarşı cinayətlərə görə həbs cəzası çəkdiyi dövrdən sonra onun evinə çatdırılıb.
Məktublardan birində Əl-Əhmədi parçanın dini əhəmiyyətini vurğulayaraq Epşteynə birbaşa müraciət edib: “Qara fraqmentə (kisvəyə) ən azı 10 milyon müsəlman — sünnilər, şiələr və digərləri toxunub”.
Yazışmalarda Əl-Əhmədinin Epşteynlə necə tanış olduğu və kisva fraqmentlərinin məhz ona niyə göndərildiyi izah edilmir. Həmçinin məktublardan onun Epşteynin adasına səfər edib-etmədiyi və ya orada baş verənlərin miqyasından xəbərdar olub-olmadığı da aydın olmur.
Qeyd edək ki, Kisvə Səudiyyə Ərəbistanında islamın ən müqəddəs məkanı sayılan Məkkədəki Kəbəni örtən qara rəngli, qızılı naxışlarla işlənmiş parçadır. Kisvə bütün dünyada müsəlmanlar üçün dərin dini əhəmiyyət daşıyır. Hər il bu parça yenisi ilə əvəz olunur, əvvəlki kisvənın fraqmentləri isə qiymətsiz dini artefaktlar hesab edilir.
Bizim.Media
