ain.az bildirir, Azertag saytına əsaslanaraq.
Bakı, 2 fevral, AZƏRTAC
Son illərdə “Yango Group” texnologiya şirkəti Azərbaycanın iqtisadiyyatına 100 milyon ABŞ dollarından artıq investisiya yatırıb. Əsas diqqət şəhər mobilliyi üçün təhlükəsiz və rahat ekosistemin formalaşdırılmasına yönəlib.
AZƏRTAC-a eksklüziv müsahibəsində “Yango Azerbaijan”ın rəhbəri Müşviq Həsənov şirkətin əsas inkişaf amilləri, yaxın illər üçün prioritetləri və Azərbaycanın “Yango Group”un regional strategiyasındakı rolu barədə danışıb.
- “Yango”nun Azərbaycandakı taksi bazarında lider mövqelərə yüksəlməsinə hansı amillər şərait yaradıb?
- “Yango” Azərbaycan bazarına geniş beynəlxalq təcrübəyə malik qlobal şirkət kimi daxil olub. Hazırda həllərimiz 25-dən çox ölkədə fəaliyyət göstərir və biz əvvəlcədən ən yaxşı təcrübələrdən yararlanaraq istifadəçilərə keyfiyyətli və ilk növbədə, təhlükəsiz xidmət təqdim etməyə çalışmışıq.
İkinci mühüm amil əlçatanlıqdır. Biz “Yango”nu yalnız sifariş xidməti kimi deyil, səfərləri, çatdırılmanı və digər nəqliyyat ssenarilərini bir tətbiqdə birləşdirən şəhər mobilliyi platforması kimi dəyərləndiririk. Qiymət modelini elə qururuq ki, xidmət istifadəçilər üçün rahat olsun, eyni zamanda, sürücü-tərəfdaşlara sabit gəlir təmin etsin. Məhz bu balans inkişafımızın əsasını təşkil edib.
- Xidmətin genişləndirilməsindən başqa, “Yango” Azərbaycanda hansı sahələrə investisiya yatırır?
- İnvestisiyalar bir neçə əsas istiqamət üzrə yönəldilir. İlk növbədə, tərəfdaş sürücülərin dəstəklənməsinə diqqət yetirilir ki, sərnişinlər üçün əlverişli tariflər onların gəlirlərinin azalmasına səbəb olmasın.
Digər istiqamət avtomobil parklarının yenilənməsidir. Sərnişin daşımalarının tənzimlənməsində edilən dəyişikliklərdən sonra tərəfdaşların avtomobilləri qısa müddətdə yeni tələblərə uyğunlaşdırması zəruri oldu. Biz Azərbaycan bankları, o cümlədən “Unibank” ilə birgə proqramlar həyata keçirdik və bu proqramlar çərçivəsində 5 mindən artıq avtomobil yeniləndi. Onların demək olar hamısı hibrid avtomobillərdir.
Eyni zamanda, ölkədə nəqliyyat ekosisteminin keyfiyyətinə nəzarətə, təhlükəsizliyə və uzunmüddətli inkişafına investisiya yatırmaqda davam edirik.
- Bu il üçün “Yango”nun əsas prioritetləri hansılardır?
- Bizim üçün təkcə rəqəmlərdə artım yox, xidmətin keyfiyyəti də vacibdir. Prioritetlər sırasında daimi istifadəçi auditoriyasının genişlənməsi, səfərlərin yüksək təhlükəsizlik səviyyəsi və yerli Azərbaycan şirkətləri ilə tərəfdaşlığın inkişafı dayanır.
Bu ilin birinci yarısında Bakıda “Yango”nun yeni ofisi açılacaq. Ofis xidmət komandalarını bir məkanda birləşdirəcək və həm Azərbaycan, həm də region üçün texnoloji mərkəz rolunu oynayacaq. Bundan başqa, ötən il “Pasha Holding” ilə strateji tərəfdaşlıq elan etdik və bu əməkdaşlığın fəal şəkildə inkişafını planlaşdırırıq.
- “Yango Group”un regional strategiyasında Azərbaycan hansı rolu oynayır?
- Azərbaycan müstəqil və strateji əhəmiyyətli bazardır. Bununla yanaşı, “Yango Azerbaijan” komandası regionun digər ölkələrində də proseslərin inkişafında fəal iştirak edir. Topladığımız təcrübə həm də Türkiyə bazarında xidmətlərin genişləndirilməsində tətbiq olunur.
- İstifadəçilər yaxın bir ildə hansı dəyişiklikləri hiss edəcəklər?
- Bütün yeniliklər texnologiyalar üzərində qurulub. Biz real vaxt rejimində monitorinq sistemlərindən istifadə edirik. Bu sistemlər sürücülük üslubuna və sürətə nəzarət etməyə imkan verir, səfərlərin ümumi təhlükəsizlik səviyyəsini artırır.
Bundan əlavə, nağdsız ödənişləri və maliyyə inteqrasiyalarını ardıcıl şəkildə inkişaf etdiririk ki, səfərlər həm istifadəçilər, həm də sürücülər üçün rahat və şəffaf olsun.
- “Yango” üçün sadiqlik proqramları nə dərəcədə əhəmiyyətlidir?
- Bu proqramlar bizim strateji alətlərimizdən biridir. Bütün bonus proqramları tam şəkildə “Yango” tərəfindən maliyyələşdirilir və sürücülərin, eləcə də kuryerlərin gəlirlərinə təsir etmir. Üstəlik, biz sürücülərə əlavə dəstək göstəririk, məsələn, məcburi sertifikasiyadan keçdiklərinə və avtomobillərini yenilədiklərinə görə bonuslar təqdim edirik.
- Xidmətin inkişafını hansı qlobal trendlər müəyyən edəcək?
- Məqsədimiz insanların şəhər daxilində səmərəli hərəkət etməsinə kömək göstərməkdir. Bunun üçün müxtəlif nəqliyyat növlərini birləşdiririk və şəxsi avtomobildən daha az istifadəni təşviq edirik. Bu yanaşma yolların yüklənməsini azaldır və şəhər mobilliyini daha dayanıqlı edir.
İctimai nəqliyyat üçün rəqəmsal alətlərdə böyük potensial görürük və onları dövlət qurumları, o cümlədən AYNA ilə birgə, ilk növbədə, Bakıda inkişaf etdirməyi planlaşdırırıq.
Sonrakı hadisələr barədə daha çox məlumat almaq üçün ain.az saytını izləyin.
