BAKI, 2 fevral. TELEQRAF
Çexiyada on minlərlə insan prezident Petr Pavelə dəstək məqsədilə küçələrə çıxıb. Mitinq prezidentlə hökumət arasında yaranan gərginlik fonunda baş tutub.
Teleqraf xəbər verir ki, "Reuters" agentliyinin məlumatına görə, Pavel yeni avroskeptik koalisiya hökumətində nazir postuna təqdim edilən və nasist salamı verməsi, eləcə də nasist simvolları paylaşması ilə qalmaqala səbəb olmuş Filip Turekin namizədliyini təsdiqləməkdən imtina edib.
Məlumata əsasən, prezidentlə hökumət arasındakı qarşıdurma son günlər daha da dərinləşib. Avropa İttifaqı və Ukraynanın tərəfdarı olan Petr Pavel ötən həftə xarici işlər naziri və “Motoristlər” partiyasının sədri Petr Maçinkani onu hədələməkdə ittiham edib. Prezident bildirib ki, Maçinkanın müşaviri vasitəsilə göndərilən mesajlarda Turekin namizədliyinə qarşı çıxmağa davam edəcəyi təqdirdə “nəticələrlə” üzləşəcəyi bildirilib.
Turek sağçı “Motoristlər” partiyasının üzvüdür və nasist salamı verməsini və simvollardan istifadə etməsini sadəcə “pis zövq” kimi izah edib, nasizm və ya irqçiliklə bağlı olmadığını iddia edib.
Prezidentin tərəfdarları Praqanın Köhnə Şəhər meydanını və Vatslav meydanını doldurub, əllərində Aİ və Çexiya bayraqları tutaraq “Biz prezidentin yanındayıq” şüarları səsləndiriblər. Aksiya zamanı bəzi küçələr polis tərəfindən bağlanıb.
Tədbirin təşkilatçıları mitinqdə 80–90 min nəfərin iştirak etdiyini bildiriblər. Polis rəsmi rəqəm açıqlamayıb. Bildirilib ki, fevralın 15-də ölkənin digər şəhərlərində də oxşar aksiyalar planlaşdırılır.
Xatırladaq ki, ötən ilin oktyabrında keçirilən seçkilərdən sonra baş nazir Andrej Babişin rəhbərlik etdiyi ANO partiyası “Motoristlər” və ifrat sağçı, Rusiyaya meyilli SPD ilə koalisiya yaradıb. Pavel dekabrda Babişi baş nazir təyin etsə də, Filip Turekin hökumətə daxil edilməsinə etiraz edib və göndərilən mesajları şantaj kimi qiymətləndirərək işi Milli Mütəşəkkil Cinayətlə Mübarizə Agentliyinə göndərib.
Petr Maçinka isə prezidentin ittihamlarını rədd edərək, mesajların adi siyasi danışıqların bir hissəsi olduğunu bildirib. O, Çexiya televiziyasına açıqlamasında siyasətin zərif insanlar üçün olmadığını və yüksək vəzifələrdə olanların daha dözümlü olmalı olduqlarını deyib.
