Ağır vəziyyətdə olanların doqquzu reanimasiyada saxlanılır...
Poliqon xəbər verir ki, Rusiyanın mülki avtobusa endirdiyi zərbə nəticəsində yaralanan mədənçilərin sayı 16 nəfərə yüksəlib, onlardan doqquzunun vəziyyəti ağır qiymətləndirilir. Hadisə ilə bağlı yayılan rəsmi məlumatlarda ölənlərin sayı ilə bağlı ziddiyyətlər qalmaqdadır.
Ukraynanın enerji şirkəti DTEK-in məlumatına görə, hücum nəticəsində 12 nəfər həlak olub. Eyni zamanda ölkənin baş nazirinin müavini Aleksey Kuleba ölənlərin sayının 16 nəfər olduğunu bildirib. Rəsmilər faciənin detalları ilə bağlı məlumatların hələ də dəqiqləşdirildiyini vurğulayırlar.
DTEK-in baş direktoru Maksim Timçenko açıqlamasında baş verənləri kəskin şəkildə pisləyib. Onun sözlərinə görə, hadisə tamamilə mülki obyektə qarşı həyata keçirilmiş əsassız və qəbuledilməz hücumdur. Timçenko qeyd edib ki, faciənin bütün təfərrüatları hələ araşdırılır, lakin artıq indidən bunun heç bir əsaslandırması olmayan terror aktı olduğu aydındır.
Hadisə Ukraynada və beynəlxalq ictimaiyyətdə ciddi rezonans doğurub. Rəsmi Kiyev mülki şəxslərin hədəfə alınmasını beynəlxalq humanitar hüququn kobud şəkildə pozulması kimi qiymətləndirir və beynəlxalq tərəfdaşları baş verənlərə hüquqi-siyasi qiymət verməyə çağırır.
Poliqon.info
