“Süleyman Mikayılov 10 ildən artıq idi ki, Qaradağın icra başçısı idi. Ancaq ortada bir şey yoxdur, problemlər çoxdur. Bu adam heç bir iş görməyib və yüzlərlə şikayətlər var. Bədən Tərbiyəsi İnstitutunu bitirib. Sonra da işləyə-işləyə guya Bakı Dövlət universitetinin hüquq fakültəsini qurtarıb. Bu nümunələrdən biridir. Heç bir iş görməyən bir çox icra başçıları, büdcədən ayrılan pulları talamaq, tenderlərə öz qohumlarını qalib gətirməklə məşğuldurlar”.
Pravda.az xəbər verir ki, bu sözləri Ağ Partiyasının sədri Tural Abbaslı Media Türk TV kanalınA müsahibəsində deyib.
O bildirib ki, icra başçılarının böyük əksəriyyəti bu vəziyyətdədir: “Necə ola bilər ki, Prezident 47 gün öncə imzaladığı sərəncamın əleyhinə yeni sərəncam imzalasın. (Nəsimi Rayon İcra Hakimiyyətinin başçısı təyin edilən və sonra azad olunan Elxan İbrahimovu nəzərdə tutur – red). Gör məmurlar, icra başçıları hansı həddə çatıb. Bu hökumətin zəifliyidir ki, Prezidentin önünə gətirdiyi kadr cəmi 47 gün işləyir. Bu adam haqqında Prezidentə xəbər verildi və uzaqlaşdırıldı. Bu adam bura gələnə qədər Kürdəmirin icra başçısı idi, orada nələr edib. Çünki bütün bu proseslərdə problemləri deyən, onları ifşa edən mexanizmin içində müxalifət yoxdur. Qaradağ icra başçısı istədiyini edirdi. Onun yanında bir müxalifətçi var idi? 10 ildən artıq idi Qaradağda işlədi. Çıxıb desin ki, mən Qaradağda 10 iş yeri açmışam, 50 gəncə iş, peşə vermişəm və s. Sonuncu dəfə hansı icra başçısının hesabatını dinləmisiniz? Mətbuat konfransı keçirib? İcra başçısının bahalı maşında gedib, torpaq, qəbir yei satmaqdan başqa işi nədir?”
Şəhanə Quliyeva
