Razılaşma ABŞ hökumətinin maliyyələşdirilməsinin davam etdirilməsini nəzərdə tutur...
Poliqon xəbər verir ki, ABŞ prezidenti Donald Tramp qanunvericiləri Ağ Ev administrasiyası ilə Senatdakı demokrat liderlər arasında əldə olunmuş razılaşmanı dəstəkləməyə çağırıb. Razılaşma Daxili Təhlükəsizlik Nazirliyi ilə bağlı kompromisi əhatə edir və federal hökumətin fəaliyyətinin dayanması ilə nəticələnə biləcək növbəti şatdaunun qarşısını almağı hədəfləyir.
Axios-un məlumatına görə, əldə edilən razılaşmaya əsasən, Senat hökumətin maliyyələşdirilməsi ilə bağlı qanunlar paketini qəbul edəcək. Lakin bu paketə Daxili Təhlükəsizlik Nazirliyi daxil edilməyəcək. Nazirliyin tabeliyində fəaliyyət göstərən Miqrasiya və Gömrük Xidməti (ICE) üçün maliyyələşdirmə yalnız iki həftəlik müddətə uzadılacaq.
Bu qərar demokratlara nazirlik daxilində islahatlar uğrunda mübarizəni davam etdirməyə imkan verəcək. Demokratlar ICE əməkdaşlarının patrul xidməti zamanı üzlərini örtməsinin və maska taxmasının qadağan olunmasını tələb edirlər. Eyni zamanda, federal agentlərin bədən kameraları daşıması məcburi edilməli, axtarış orderlərindən isə yalnız istisna hallarda istifadə olunmalıdır.
Məlumata görə, Senat üzvləri hökumətin maliyyələşdirilməsi ilə bağlı səsverməni yanvarın 30-u günün sonunadək keçirməlidirlər. Fevralın 2-də işə başlayacaq Nümayəndələr Palatası da bu qanunvericilik paketini təsdiqləməlidir. Yalnız bundan sonra sənəd prezident Donald Trampın imzası üçün təqdim olunacaq.
Poliqon.info
