Tenerifedə insan alveri ilə məşğul olan cinayət şəbəkəsi zərərsizləşdirilib...
Poliqon xəbər verir ki, İspaniyanın Milli Polisi və Vergi İdarəsinin Gömrük Xidməti insan alveri və cinsi istismar məqsədilə fəaliyyət göstərən cinayətkar təşkilatı ifşa edib. Hüquq-mühafizə orqanlarının keçirdiyi əməliyyat nəticəsində Tenerifenin cənubunda yerləşən gecə klublarında fahişəliyə məcbur edilən 27 xarici qadın azadlığa buraxılıb. Polis mətbuat xidmətinin məlumatına görə, zərərçəkənlər arasında yetkinlik yaşına çatmayanlar da olub.
İlkin araşdırmalara əsasən, cinayət qruplaşmasına və klubların fəaliyyətinə Santa-Krus-de-Tenerife şəhərindən olan bir cütlük rəhbərlik edib. Onların əlaltıları Cənubi Amerika ölkələrində sosial cəhətdən həssas və yoxsul təbəqələrdən olan gənc qadınları hədəf alaraq, onlara striptizçi kimi işləmək və daha yaxşı həyat vəd ediblər. Bu vədlərlə qadınlar İspaniyaya gətirilib.
Avropaya çatdıqdan sonra qadınlara təşkilat qarşısında “borcları” olduğu bildirilib və bu borcu ödəmək üçün pulla cinsi əlaqəyə məcbur ediliblər. Məlumata görə, zərərçəkənlərin müqavimət göstərməməsi üçün onları narkotik maddələrdən istifadə etməyə məcbur edir və ya içkilərinə gizli şəkildə qadağan olunmuş maddələr qatırdılar.
Əməliyyat çərçivəsində polis və gömrük əməkdaşları Tenerifedə yeddi yaşayış ünvanında, üç gecə klubunda və bir ofis məkanında axtarış aparıblar. Axtarışlar zamanı müxtəlif sənədlər, 90 min avro nağd pul, premium sinif avtomobil, bahalı saatlar, zinət əşyaları və çoxsaylı mobil telefonlar müsadirə edilib. İstintaq orqanları hesab edir ki, şübhəlilər seks alveri fəaliyyəti nəticəsində böyük maliyyə vəsaiti əldə ediblər.
Poliqon.info
