Mher Qriqoryan: Ermənistanda dövlət idarəçiliyinin islahatı üzrə yeni Strategiyanın hazırlanmasına başlanılacaq...
Baş nazirin müavini SIGMA hesabatının tövsiyələri əsasında Ermənistanda yeni strategiyanın hazırlanacağını açıqlayıb.
Poliqon xəbər verir ki, Ermənistan Baş nazirinin müavini Mher Qriqoryan bu gün SIGMA (Support for Improvement in Governance and Management) proqramı çərçivəsində hazırlanmış “Ermənistanın dövlət idarəçiliyinin qiymətləndirilməsi” hesabatının təqdimat mərasimində çıxış edərək, yaxın vaxtlarda dövlət idarəçiliyinin islahatı üzrə yeni Strategiyanın hazırlanmasına başlanılacağını bildirib.
Qriqoryan qeyd edib ki, hesabat Ermənistanın dövlət idarəçiliyi sisteminin Avropa İttifaqı ilə inteqrasiya prosesində olan ölkələrlə eyni metodologiya və meyarlar əsasında qiymətləndirilməsi baxımından xüsusi əhəmiyyət kəsb edir. O, son illərdə ölkənin çoxsaylı böhranlara baxmayaraq strateji idarəetmə, dövlət xidmətlərinin rəqəmsallaşdırılması, dövlət maliyyəsinin idarə edilməsi, korrupsiyaya qarşı mübarizə və digər sahələrdə əhəmiyyətli irəliləyişlər əldə etdiyini vurğulayıb.
Baş nazirin müavini əlavə edib ki, SIGMA hesabatında göstərilən tövsiyələr yeni Strategiyanın əsasını təşkil edəcək və bu sənəd Ermənistanın dövlət idarəçiliyini daha şəffaf, səmərəli və Avropa standartlarına uyğun səviyyəyə qaldırmağı hədəfləyir.
Poliqon.info
