Yeddi Avropa İttifaqı (Aİ) ölkəsi Avropa Komissiyasının sədri Ursula fon der Leyen və Avropa Şurasının sədri Antonio Kostanı Rusiyanın dondurulmuş aktivlərindən istifadə edərək Ukrayna üçün "təzminat krediti"nin təsdiqlənməsi ilə bağlı qərarı tezləşdirməyə çağırıb.
"Operativ Məlumat Mərkəzi-OMM" xəbər verir ki, bununla bağlı "Politico" məlumat yayıb.
Bildirilib ki, Estoniya, Litva, Latviya, Polşa, Finlandiya, İsveç və İrlandiyanın imzaladığı sənədə görə, dekabrda kreditin təsdiqlənməsi Ukraynanı özünü müdafiə etmək və ədalətli və davamlı sülh danışıqları aparmaq üçün güclü mövqeyə qoyacaq.
Avropa Komissiyası daha əvvəl Almaniya, Fransa və İtaliyanı Rusiyanın dondurulmuş aktivlərindən istifadə etməklə Ukraynaya kreditin əsas təminatçısı kimi göstərmişdi .
Ukraynaya 210 milyard avroya qədər kreditin təmin edilməsi üçün Aİ ölkələrindən fərdi olaraq milyardlarla avro yardım etmələri tələb olunacaq.
Qəzetin yazdığına görə, Almaniya 52 milyard avro ayırmaqla kreditin ən böyük hissəsini öz üzərinə götürəcək.
