Trass 2022-ci ildəki istefasına səbəb olanları açıqlayacağını və “dərin dövlətə” meydan oxuyacağını bildirir...
Poliqon xəbər verir ki, Böyük Britaniyanın keçmiş baş naziri Liz Trass özünün həftəlik şousunu başladığını elan edib. Siyasətçi bildirib ki, verilişdə onun 2022-ci ildə istefasına təkan verən şəxsləri ifşa edəcək və Britaniya ilə Qərb ölkələrində “əslində nələrin baş verdiyini” izləyicilərə çatdıracaq.
Liz Trass sosial şəbəkə X-də yayımladığı video-müraciətdə bildirib ki, ölkədə yaşanan maliyyə böhranında onu günahlandırmaqla “dərin dövlətin” və onun media-siyasi dairələrdəki tərəfdarlarının onu sıradan çıxarmağa çalışdıqlarını iddia edib. “Onların illərlə davam edən uğursuzluqlarına meydan oxuduğum üçün məni məhv etmək istədilər. İndi geri qayıtmışam. Məni devrənlərin hamısını ifşa edəcəyəm. Dərin dövlətə meydan oxuyacağam”, — deyə Trass vurğulayıb.
Siyasətçinin sözlərinə görə, veriliş hər cümə günü təxminən Moskva vaxtı ilə 21:00-da yayımlanacaq. İlk buraxılış 5 dekabrda təqdim ediləcək. Lakin Trass proqramın hansı platformada yerləşdiriləcəyi ilə bağlı məlumat verməyib.
Liz Trass 5 sentyabr 2022-ci ildə Britaniyanın Mühafizəkarlar Partiyasına rəhbər seçilmiş və ertəsi gün baş nazir kimi fəaliyyətə başlamışdı. Onun hökumətdə çalışma müddəti cəmi 45 gün davam edib — bu, ölkə tarixində ən qısa baş nazirlik dövrüdür. Trass 20 oktyabrda istefa verərək bunun səbəbini öhdəliklərin öhdəsindən gələ bilməməsi ilə izah etmişdi.
Onun təşəbbüsü ilə 23 sentyabrda maliyyə naziri Kvazi Kvartend yeni iqtisadi islahat strategiyası təqdim etmişdi. Sənəddə sosial ödənişlərin və vergilərin azaldılması nəzərdə tutulurdu. Lakin bu proqram fond bazarında və istiqrazlarda ciddi dalğalanmalara səbəb oldu. Bir ay ərzində funt sterlinqin məzənnəsi 1985-ci ildən bəri ən aşağı səviyyəyə düşdü, Böyük Britaniyanın Bankı isə bazarın çökməsinin qarşısını almaq üçün təcili olaraq 65 milyard funt sterlinq (təxminən 72 milyard dollar) dəyərində dövlət istiqrazları almalı oldu.
Analitiklərin fikrincə, həmin böhran Trassın siyasi mövqelərini zəiflətdi və onun rekord qısa müddətdə istefa verməsinə yol açdı. Yeni şou isə siyasətçinin həmin dövrün pərdəarxası proseslərini ictimaiyyətə təqdim etmək cəhdi kimi qiymətləndirilir.
Poliqon.info
