Türkiyə, ümumi həcmi 22 milyard kubmetr olan və 2025-ci ilin sonunda başa çatacaq Rusiya qazı üzrə mövcud müqavilələrin müddətini bir il uzatdığını açıqlayıb. Vətəninfo.az xəbər verir ki, bu barədə Türkiyənin Energetika naziri Alparslan Bayraktar məlumat verib.
Bayraktar bildirib ki, Türkiyə Avropada Rusiya qazının sonuncu əsas idxalçısı olaraq, mayeləşdirilmiş təbii qazın tədarükü üçün bir sıra uzunmüddətli müqavilələr də imzalayıb. O, qarşıdakı illərdə qlobal bazarda gözlənilən təchizat profisitinə nəzərən, yeni təchizatların böyük bir hissəsinin ABŞ-dan gələcəyini əlavə edib.
Nazir, dövlətə məxsus BOTAŞ-ın Rusiya ilə olan qaz müqaviləsini rəsmi olaraq uzatdığını və “Qazprom-dan tədarüklərin gələn il də davam edəcəyini, lakin biz daha qısa müddətə, təxminən bir il müddətinə diqqət yetiririk” deyib.
Bundan əlavə, Bayraktar İranla 2026-cı ilin iyul ayında başa çatacaq 10 milyard kubmetr qazın idxalı ilə bağlı danışıqların davam etdiyini, eyni zamanda İran vasitəsilə Türkmənistan qazının həcminin artırılması məsələsinin müzakirə olunduğunu bildirib.
Türkiyə, həmçinin ABŞ-dan mayeləşdirilmiş təbii qaz almaq öhdəliyini yerinə yetirmək üçün bu ölkədə qaz istehsalına sərmayə qoymağı planlaşdırır. Bayraktar, ABŞ bazarında istehsal zəncirinin yuxarı sektorlarına sərmayə qoymağı düşündüklərini və bunun üçün dövlətə məxsus TPAO, Chevron və Exxon kimi enerji nəhəngləri ilə danışıqlar apardıqlarını açıqlayıb. Yeni müqavilənin yanvarın əvvəlində imzalanması gözlənilir.
