Azərbaycan Xalq Cəbhəsi Partiyasının (AXCP) sədri Əli Kərimli və Milli Şuranın üzvü Gültəkin Hacıbəylinin saxlanılması siyasi gündəmdə ciddi rezonans doğurub. Onların adlarının Ramiz Mehdiyev işi ilə əlaqələndirilməsi istintaq prosesinə dair sualların artmasına səbəb olub.
Globalinfo.az-a danışan Azərbaycan Demokrat Partiyasının (ADP) sədri Sərdar Cəlaloğlu deyib ki, Əli Kərimli sıradan siyasətçi deyil:
Sərdar Cəlaloğlu
“O, Əbülfəz Elçibəy dövründə dövlət katibi, Heydər Əliyevin hakimiyyəti zamanında isə deputat olub, ölkədə böyük və aktiv bir partiyanın sədridir. Buna görə də onun barəsində əsaslı və konkret faktlar olmadan hər hansı ittiham irəli sürmək mümkün deyil. Eyni zamanda əsassız olaraq həbsdə saxlanılması da real görünmür, çünki beynəlxalq ictimaiyyət onu tanıyır. Hazırda yalnız ilkin məlumatlar mövcuddur və istintaqın nəticələrini gözləmək lazımdır. Prosessual araşdırmalar irəlilədikcə istintaqın əldə etdiyi dəlil və sübutlara əsasən, ona qarşı ittiham irəli sürülə bilər. Bu səbəbdən tələsik nəticə çıxarmaq doğru deyil. Siyasətçilərin əsassız yerə həbsi həm daxili, həm də beynəlxalq müstəvidə ciddi reaksiyalara səbəb ola bilər və hökumətin də bunda maraqlı olması inandırıcı deyil.
Əli Kərimli hüquq təhsilli şəxsdir və onu müdafiə edən kifayət qədər hüquqşünas var. Ona qarşı irəli sürüləcək hər bir ittiham məhz qanun çərçivəsində araşdırılmalıdır. İddiaya görə, evində aparılan axtarış zamanı Ramiz Mehdiyevin hazırladığı məktubun qaralaması və digər sənədlər tapılıb. Bu sənədlərin nə olduğu, hansı məzmun daşıdığı və həbs üçün yetərli dəlil sayılıb-sayıla bilməyəcəyi açıqlanmalıdır. Bütün bu məsələlərin dəqiqləşməsi üçün istintaqın nəticələri gözlənilməlidir”.
Ağ Partiya sədri Tural Abbaslı bildirib ki, artıq uzun müddətdir Ramiz Mehdiyev və onun ətrafı barəsində istintaq aparılır:
“Bu məsələ müxtəlif aspektlərdən araşdırılıb və onun üzərindəki maddələrdən biri dövlət çevrilişinə cəhd, yəni hakimiyyəti zorla ələ keçirmək və saxlamaq ittihamıdır. Aydındır ki, belə bir əməli təkbaşına və bir neçə nəfərlə həyata keçirmək mümkün deyil. Dövlət çevrilişinə cəhd geniş struktur tələb edir, iqtisadi, maliyyə, media və siyasi istiqamətlər üzrə əlaqələndirilmiş fəaliyyət olmalıdır. Əgər Mehdiyevin işi də bu maddə ilə aparılırsa, proses yalnız onun və bir-iki köməkçisinin həbsi ilə məhdudlaşmamalıdır. Bu, daha geniş dairəni əhatə edir. Mətbuatda bu işlə bağlı siyahıların mövcudluğu haqqında məlumatlar yayıldı və həmin siyahılarda Gültəkin Hacıbəyli ilə Əli Kərimlinin adları çəkilirdi. Düşünürəm ki, bu prosesdə hər hansı şəxsin rolu varsa, statusundan asılı olmayaraq qanun qarşısında cavab verməlidir. Heç kimin tutduğu mövqe ona əlavə imtiyaz yaratmır. Məsələn, əgər Ağ Partiyanın üzvlərinin bu işdə iştirakı təsdiqlənsə, onlar da digər şəxslər kimi məsuliyyətə cəlb olunmalıdır.
Bu qədər həbslərin aparılması da onu göstərir ki, istintaq orqanlarının müəyyən əsaslar var. Əli Kərimli ölkənin tanınan siyasi partiya rəhbərlərindən biridir və belə bir şəxs əsaslı sübutlar olmadan saxlanılmaz. Yəqin ki, proseslə bağlı mediaya və ictimaiyyətə əlavə məlumat veriləcək – kimin hansı səviyyədə bu prosesdə iştirakı olub, ittihamlar nəyə əsaslanır. Qanun qarşısında hamı bərabərdir. Əgər kimsə bu prosesdə iştirak edibsə, cəzasını almalıdır. Əgər iştirak etməyibsə, onda məsələ siyasi rəqiblərin sıradan çıxarılması kimi qiymətləndirilə bilər. Hazırkı beynəlxalq şəraitdə Azərbaycana qarşı müxtəlif təzyiqlər var və belə bir vaxtda əlavə bəhanələr üçün zəmin yaratmaq məqsədəuyğun deyil”.
Tural Abbaslı
Tural Abbaslının sözlərinə görə, istintaq orqanlarının bu addımları atması üçün əlində müəyyən məlumatlar mövcuddur:
“Əks halda bu qədər səs-küylü həbslər həyata keçirilməzdi. Əgər saxlanılma davam edəcəksə, şəxs məhkəmə qarşısına çıxarılmalı, müəyyən sübutlar təqdim olunmalı və ictimaiyyət məlumatlandırılmalıdır. Nəticə olaraq, prosesdə iştirakı olan – istər müxalifət, istər iqtidar nümayəndəsi, istərsə də keçmiş və ya hazırkı vəzifəli şəxs qanun qarşısında cavab verəcək”.
