TÜRKSOY ölkələri Mədəniyyət Nazirləri Daimi Şurasının 42-ci iclası noyabrın 28-də Qazaxıstanda, 2025-ci ildə “Türk Dünyasının Mədəniyyət Paytaxtı” missiyasını daşıyan Aktau şəhərində keçirilib.
Qazaxıstanın mədəniyyət və informasiya naziri, TÜRKSOY-un 42-ci dönəm koordinatoru Aida Balayevanın sədrlik etdiyi iclasda TÜRKSOY-un baş katibi Sultan Raev, Özbəkistanın mədəniyyət naziri Ozodbek Nazarbekov, Türkmənistanın mədəniyyət naziri Atageldi Şamuradov, Azərbaycan mədəniyyət nazirinin müavini Murad Hüseynov, Qırğızıstan mədəniyyət, informasiya və gənclər siyasəti nazirinin müavini A.S. Madaminov və Türkiyə mədəniyyət və turizm nazirinin müavini Serdar Çam iştirak ediblər.
TÜRKSOY-un yaydığı məlumatda bildirilir ki, iclasda təşkilatın 42-ci dönəm iş hesabatı və 2024-cü il maliyyə hesabatı təsdiqlənib, “Aktau 2025: Mədəniyyət Paytaxtı” proqramı çərçivəsində fəaliyyətlər məmnunluqla qiymətləndirilib və qarşıdakı dövr üçün mədəni əməkdaşlığın gündəliyi nəzərdən keçirilib.
Daimi Şura Qazaxıstan Prezidenti Kasım-Jomart Tokayevə Türk dünyasında mədəni həmrəyliyə verdiyi güclü dəstəyə görə təşəkkürünü bildirib, “Aktau 2025” proqramının uğurla həyata keçirilməsinə görə Qazaxıstanın mədəniyyət və informasiya naziri Aida Balayevaya, eləcə də görüşə ev sahibliyinə görə Mangistau vilayətinin və Aktau şəhərinin rəhbərliyinə minnətdarlıq ifadə edib.
İclasda Türk Dövlətləri Təşkilatının (TDT) bu ilin oktyabrında Qəbələdə keçirilən XII sammitində dövlət başçıları tərəfindən mədəni əməkdaşlıqla qəbul edilmiş qərar və tapşırıqlar müzakirə olunub.
Baş katib Sultan Raev TDT-nin Qəbələ sammitində qəbul edilən “TÜRKSOY-un inkişaf etdirilməsi və gücləndirilməsi haqqında” qərarın əhəmiyyətini vurğulayaraq deyib: “Bu il biz həm də tarixi hadisənin şahidi olduq ki, dövlət başçıları TÜRKSOY-un zamanın çağırışlarına uyğun şəkildə gücləndirilməsinin vacibliyini qeyd etdilər və Baş katibliyə bu işə başlamaq barədə tapşırıq verildi. Bu, sadəcə bir qərar deyil, Türk dünyası ölkələrinin mədəni əməkdaşlığının gələcəyini müəyyənləşdirən strateji mərhələdir”.
Daimi Şura 2026-cı ildə TÜRKSOY-un fəaliyyətinin təkmilləşdirilməsi üçün işçi qrupunun yaradılması barədə qərar qəbul edib.
Eyni zamanda, “Aktau – Türk Dünyasının Mədəniyyət Paytaxtı” ilinin yekunları təqdim olunub. Qazaxıstanın mədəniyyət və informasiya naziri Aida Balayeva qeyd edib ki, il çərçivəsində genişmiqyaslı işlər görülüb, bir sıra layihələr həyata keçirilib.
İclasda 2026-cı il üçün “Türk Dünyasının Mədəniyyət Paytaxtı” adının Özbəkistanın tarixi şəhəri Əndicana verilməsi haqqında daha öncə razılaşdırılmış qarar diqqətə çatdırılıb. Daimi Şura üzvləri “köklü kimliyi ilə Türk dünyasının ortaq mədəni irsini təcəssüm etdirən” Əndicanın bu məsuliyyəti uğurla öz üzərinə götürəcəyinə əminliklərini ifadə ediblər.
2026-cı il proqramının TÜRKSOY-un Baş Katibliyi, Özbəkistanın Mədəniyyət Nazirliyi və Əndicanın yerli icra hakimiyyəti ilə əməkdaşlıqda hazırlanması və növbəti Daimi Şura iclasının 2026-cı ildə Əndicanda keçirilməsi qərara alınıb.
Daimi Şuranın 42-ci iclasının yekun bəyannaməsində həmçinin 2027-ci il üçün “Türk Dünyasının Mədəniyyət Paytaxtı” estafetinin Türkiyə tərəfindən qəbul ediləcəyi və bu adı alacaq şəhərin daha sonra Türkiyə Mədəniyyət və Turizm Nazirliyi tərəfindən elan ediləcəyi qeyd olunub.
Sonda Qazaxıstanın mədəniyyət və informasiya naziri Aida Balayeva 2026-cı ildə Əndican şəhərinə “Türk Dünyasının Mədəniyyət Paytaxtı” adının verilməsi ilə əlaqədar təşkilatda dönəm koordinatoru səlahiyyətlərini özbəkistanlı həmkarı Ozodbek Nazarbekova təhvil verib, ona TÜRKSOY-un bayrağını və rəmzi heykəliciyi təqdim edib.
***
Həmin gün axşam “Aktau Xalq Arena”da keçirilən təntənəli mərasimlə “Aktau 2025: Mədəniyyət Paytaxtı” ilinə yekun vurulub.
Azərbaycan, Qazaxıstan, Qırğızıstan, Özbəkistan, Türkiyə, Türkmənistan və Türk dünyasının digər bölgələrindən 250-yə yaxın sənətçinin iştirak etdiyi bağlanış konserti qardaş xalqların zəngin mədəni irsini nümayiş etdirib.
