Azərbaycan Dillər Universitetində (ADU) “Süni intellekt və humanitar elmlər: müasir vəziyyət və perspektivlər” mövzusunda beynəlxalq elmi konfrans keçirilib.
Konfransda dilçilik (koqnitiv dilçilik, neyrolinqvistika, korpos dilçiliyi, sosiolinqvistika), tərcüməşünaslıq (maşın tərcüməsi), ədəbiyyatşünaslıq (Ədəbiyyat süni intellekt dövründə), xarici dillərin tədrisi metodikası, psixologiya və fəlsəfə, media tədqiqatları mövzusunda məruzələr təqdim olunub.
ADU-nun rektoru akademik Kamal Abdulla tədbirin açılışında çıxış edərək bildirib ki, müasir dünyada süni intellektlə bağlı aparılan tədqiqatlar və araşdırmalar həyat fəaliyyətinin bütün sahələrində özünü göstərir: “Bu gün universitetimizdə əlamətdar bir gündür. Böyük məmnuniyyətlə qeyd etmək istəyirəm ki, tədbirdə İsrail, Belarus, Venesuela, Mərakeş, Birləşmiş Ərəb Əmirlikləri, Gürcüstanın ölkəmizdəki səfirləri iştirak edirlər. Konfransda İtaliyadan, İspaniyadan, Mərakeşdən, Rumıniyadan, Özbəkistandan, Türkiyədən, Pakistandan, Ukraynadan, Rusiyadan, Belarusdan, Qazaxıstandan olan qonaqlarımız var".
Rektor diqqətə çatdırıb ki, beynəlxalq konfransda 50-dən çox ölkədən mütəxəssislər məruzəçi kimi qeydiyyatdan keçib. O cümlədən Azərbaycanın əksər ali təhsil müəssisələrindən mütəxəssislər konfransda iştirak edirlər.
AMEA-nın müxbir üzvü, Azərbaycan Dövlət Neft və Sənaye Universitetinin professoru Rafiq Əliyev qeyd edib ki, konfransın mövzusu müasir dünyada elmə yeni yanaşmanı və tədqiqat imkanlarını qiymətləndirmək, humanitar elmlərlə süni intellektin qarşılıqlı şəkildə öyrənilməsi baxımından yüksək əhəmiyyətə malikdir. O, süni intellektin humanitar sahələrə təsirinin, tədqiqat və tədris prosesində tətbiq imkanlarının genişləndirilməsinin vacibliyini diqqətə çatdırıb.
Türkiyənin Hacettepe Universitetinin Fransız dili və ədəbiyyatı kafedrasının müdir müavini Eylem Aksoy Alp, konfransa videomüraciətlə qatılan Pakistanın Kompüter və İnkişaf etməkdə olan Milli Elmlər Universitetinin Humanitar elmlər fakültəsinin dekanı Summaira Sarfraz, İspaniyanın Alkala Universitetinin Dil və ədəbiyyatın tədrisi fakültəsinin dekanı Xesus Qarsia Laborda, AMEA-nın Nəsimi adına Dilçilik İnstitutunun Süni intellekt kompüter dilçiliyi şöbəsinin müdiri Məsud Məmmədov, Rumıniyanın Aleksandru İoan Kuza adına Yassı Universitetinin professoru Lyudmila Bejenaru, Moskva Dövlət Linqvistik Universitetinin Layihə ofisinin direktoru Olqa Yeqorova, Almaniyanın DAAD təşkilatının ADU-da nümayəndəsi Liza Brandt, İtaliyanın Sapienza Universitetinin əməkdaşı Mario Soldaini konfransın müasir elmi çağırışlar baxımından əhəmyyətini və bu sahədə beynəlxalq əməkdaşlığın vacibliyini vurğulayıb, təşkilatçılığa görə ADU rəhbərliyinə təşəkkür ediblər.
Konfransda “Dil və süni intellekt”, “Süni intellekt və tərcümə məsələləri”, “Ədəbiyyat süni intellekt dövründə”, “Xarici dillərin tədrisində süni intellektin rolu”, “Fəlsəfə və psixologiyaya dair tədqiqatlarda süni intellekt problem”, “Süni intellekt və media tədqiqatları” mövzulu bölmə iclasları keçirilib.
