İndoneziyanın Sumatra adasında güclü yağışların səbəb olduğu daşqın və torpaq sürüşmələrində ölənlərin sayı 174-ə yüksəlib.
Ölkədə son günlər bir çox insanın həyatını itirməsinə səbəb olan pis hava şəraiti davam edir.
İndoneziya Fəlakətlə Mübarizə Agentliyinin rəhbəri Suharyanto açıqlamasında Şimali Sumatrada həyatını itirənlərin sayının 116-ya, Aceh bölgəsində isə 35-ə çatdığını bildirib.
Suharyanto həmçinin qeyd edib ki, axtarış-xilasetmə qrupları Qərbi Sumatrada da 23 nəfərin meyitini tapıb.
İtkin düşmüş 74 nəfər üçün axtarış-xilasetmə işləri davam edir.
İndoneziya Meteorologiya, İqlim Elmləri və Geofizika Agentliyi pis hava şəraitinin bir neçə gün davam edəcəyi barədə xəbərdarlıq edib.
İndoneziya Fəlakət İdarəsi isə minlərlə ev və binanın yağışlar səbəbindən su altında qaldığını və minlərlə ailənin köçdüyünü bildirib.
Həmçinin düyü sahələri, heyvanlar və ictimai məkanların da daşqınlardan zərər gördüyü qeyd edilib.
