Naxçıvan, 28 noyabr, AZƏRTAC
Naxçıvanda bu gün Azərbaycan–Çin təhsil əməkdaşlığı çərçivəsində həyata keçirilməsinə başlanılan “İnteraktiv təhsil yardımı” layihəsi daha çox maddi dəstək xarakteri daşıyır. Layihə 216 məktəbin rəqəmsallaşdırılmasını, fiber-optik internetə qoşulmanı, 2300 planşetin şagirdlərə verilməsini, həmçinin bu işin təşkili üçün zəruri olan server və data mərkəzinin qurulmasını, o cümlədən də 24 məktəbin kameralaşdırılması və idarəedilməsini özündə birləşdirir.
AZƏRTAC-ın bölgə müxbiri xəbər verir ki, bu sözləri Naxçıvanda“İnteraktiv təhsil yardımı” layihəsinin təqdimatından sonra jurnalistlərə müsahibəsində Azərbaycanın elm və təhsil naziri Emin Əmrullayev deyib.
Nazir qeyd edib ki, bu avadanlıqlar Naxçıvan Muxtar Respublikasının məktəblərində rəqəmsallaşmanın, elektron təhsil sisteminin qurulmasının və təhsilin keyfiyyətinin artırılmasına xidmət edir.
