"Ukraynada müharibənin dayandırılması, Qəzzada sülh planının həyata keçirilməsi və Suriyada sabitlik Türkiyə üçün önəmlidir".
Missiya.Az xəbər verir ki, bunu Türkiyənin xarici işlər naziri Hakan Fidan Berlində almaniyalı həmkarı Yohan Vadeful ilə keçirdiyi birgə mətbuat konfransı zamanı deyib.
O bildirib ki, Türkiyənin Avropa İttifaqına (Aİ) üzvlük prosesində kriteriya əsaslı qiymətləndirmələrlə bağlı heç bir problemi yoxdur, ola da bilməz:
“Burada əsas problem prosesin getməməsi və fəsillərin açılmamasıdır. Bu mövzuda lazımi müzakirələr apardıq. Bizim gözləntimiz Aİ-nin fəsilləri yenidən açması, Türkiyə və namizəd ölkələrlə mümkün olan ən normal əsasda əlaqələri inkişaf etdirməsidir”, - deyə siyasətçi vurğulayıb.
Hakan Fidan qeyd edib ki, Qəzzada sülh planının mümkün qədər tez həyata keçirilməsi çox vacibdir:
“Biz dağıntılara və soyqırıma qayıtmaqdan qaçmalıyıq. Kifayət qədər dağıntı və insan ölümü var. Hamımız birlikdə intensiv işləməliyik. Humanitar yardımlar Qəzzaya mümkün qədər tez getməlidir. Əks halda, zorakılıq spiralına qayıtmaq riskimiz var", - deyə siyasətçi əlavə edib.
Daşqın HəsənovMissiya.Az
