Məlum olduğu kimi, fərdi sahibkarların sosial sığorta haqlarının mövcud dərəcələrlə hesablanması müddəti 1 yanvar 2026-cı ildə başa çatır.
Yeniavaz.comDövlət Vergi Xidmətinə istinadən xəbər verir ki, bundan irəli gələrək “Sosial sığorta haqqında” Qanuna dəyişiklik edilməsi təklif olunur.
Belə ki, mövcud qanuna əsasən, fərdi sahibkarlar özünə görə minimum aylıq əməkhaqqının tikinti sahəsində 50 faizi, digər sahələrdə (yəni ticarət, iaşə, tərcümə, mühasibat və s. xidmət sahələri) 25 faizi miqdarında sosial sığorta haqları ödəyirlər. Həmçinin regionlar üzrə əmsallar tətbiq edilir (Bakı şəhərində 100 faiz, Sumqayıt və Gəncə şəhərlərində 90 faiz, digər şəhərlərdə 80 faiz, rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faiz, kənd yerlərində 50 faiz miqdarında).
Vergi Xidmətindən bildirilir ki, “Sosial sığorta haqqında” Qanuna təklif edilən dəyişikliyə əsasən, fərdi sahibkarlar gələn ildən sosial sığorta haqlarını dövriyyədən 2% dərəcə ilə ödəyəcəklər. Bu zaman sığorta haqqının minimum məbləğ həddi minimum əmək haqqının 15 faizi, yəni 60 manat, maksimum məbləğ həddi isə minimum əmək haqqının 1 misli, yəni 400 manat təşkil edəcək.
Məlumat üçün onu da bildirək ki, qanunvericiliyə edilən təklif qəbul olunarsa, aylıq dövriyyəsi çox olan fərdi sahibkarlar daha çox sosial sığorta haqqı ödəyəcəklər.
Məsələn, mövcud qanuna əsasən, hazırda Bakı şəhərində xidmət sektorunda fəaliyyət göstərən və aylıq dövriyyəsi 20 000 manat olan fərdi sahibkarın aylıq sosial sığorta ödənişi 100 manata bərabərdir. Ancaq, təklif olunan dəyişiklik qəbul olunduqdan sonra aylıq dövriyyəsi 20 000 manat olan fərdi sahibkar ayda 400 manat ödəməli olacaq.

Elnur Əli