Lisenziyaya əsasən, şirkətlə əməliyyatlara icazə verilir, lakin vəsaitlər dondurulmuş hesabda qalmalıdır...
Poliqon xəbər verir ki, Böyük Britaniya hökuməti Lukoil International GmbH və ona bağlı xarici strukturlarla əməliyyatlara müvəqqəti icazə verib. Britaniya Maliyyə Nazirliyinin rəsmi saytında dərc edilən xüsusi lisenziyaya görə, bu qərar 26 fevral 2026-cı ilədək qüvvədə olacaq. Lisenziya Lukoil-in beynəlxalq aktivlərinin sanksiya rejimindən qısa müddətli çıxarılmasını nəzərdə tutur.
Sənəddə qeyd edilir ki, əgər Rusiyanın Lukoil şirkəti həmin aktivlər üzərində nəzarəti saxlayırsa, Lukoil International və ya onun törəmə şirkətləri üçün nəzərdə tutulan ödənişlər yalnız dondurulmuş hesablara köçürülə bilər. Yalnız Lukoil-in bu aktivlərə nəzarəti tam aradan qalxdıqdan sonra vəsaitlərin istifadə olunmasına icazə veriləcək. Britaniya rəsmiləri bəyan edib ki, lisenziya istənilən an geri çağırıla bilər və bu, Londonun sanksiya siyasətində sərt nəzarət xəttini göstərir.
Xatırladaq ki, Böyük Britaniya 15 oktyabrda Lukoil və “Rosneft”ə qarşı sanksiyalar tətbiq edib. London bu addımı şirkətlərin Rusiya hökumətinin maraqlarına xidmət edən kommersiya fəaliyyətləri ilə əsaslandırmışdı. Rusiya səfirliyi həmin vaxt xəbərdarlıq etmişdi ki, belə məhdudiyyətlər beynəlxalq enerji bazarını “destabilləşdirə bilər”.
Britaniya hökuməti oktyabr və noyabr aylarında sanksiya siyahısına bir neçə korrektələr etmişdi. 22 oktyabrda “Rosneft”in Almaniyadakı iki törəmə şirkəti, 20 noyabrda isə Lukoil-in Bolqarıstandakı iki müəssisəsi müvəqqəti olaraq məhdudiyyətlərdən çıxarılmışdı. Bu qərarlar Londonun sanksiyaların konkret aktivlərə tətbiqində çevik, amma eyni zamanda nəzarətçi taktika seçdiyini göstərir.
Ekspertlər hesab edir ki, Britaniyanın Lukoil-in beynəlxalq aktivlərini qismən və müvəqqəti azad etməsi enerji bazarında kəskin narahatlıqların qarşısını almağa, eyni zamanda şirkətin aktivlərinin gələcək hüquqi statusunu müəyyənləşdirməyə yönəlib. Bununla belə, Londonun davamlı mövqeyi dəyişmir.Şirkətlərin Kremlin iqtisadi maraqlarına xidmət edən fəaliyyətləri sərt sanksiya nəzarətində qalacaq.
Poliqon.info
