Kafu bu komandanı İtaliya çempionu görmək istəyir

Dünya futbolunun braziliyalı əfsanəsi, keçmiş sağ cinah müdafiəçisi Kafu cari mövsümdə İtaliya çempionu görmək istədiyi komandanı açıqlayıb.

Arena.az Kafunun müvafiq açıqlamasını təqdim edir:

“Bunu “Roma” etsə, çox şad olaram. Klub himninin ifasının çoxdan intizarındayam, hələ də tüklərim biz-biz olur”, deyə Kafu vurğulayıb.

Xatırldaq ki, Kafu “Roma” ilə 2000/2001-ci illər mövsümündə İtaliya çempionu olub. Bu, “canavarlar”ın qazandığı sonuncu skudettodur.

“Roma”nın digər canlı əfsanəsi, keçmiş hücumçusu və kapitanı Françesko Totti də İtaliya A Seriyasının cari mövsümündə çempionluq uğrunda mübarizəyə namizəd gördüyü komandaları açıqlayıb. Braziliyalı müdafiəçidən fərqli olaraq, italyan keçmiş futbolçu doğma klubunu o qədər də şanslı hesab etmir:

“Bu mövsümdə skudetto uğrunda mübarizədə üç komanda var – “İnter”, “Napoli” və “Milan”. Düşünürəm, məhz bu üç komanda qənimət uğrunda sona qədər mübarizə aparacaq”, deyə Totti vurğulayıb.

Yeri gəlmişkən, “Milan”ın ukraynalı keçmiş hücumçusu Andrey Şevçenko da “İnter” və “Milan”ın çempionluq şansları barədə düşüncələrini dilə gətirib:

“Hər iki komanda yaxşı formadadır. Amma hələ azacıq zəif olan “Milan” üçün nəticə daha vacibdir. Onlar tərəqqiyə davam etməlidirlər, məğlubiyyət müvafiq gedişatı dayandıra bilər”.

Xatırladaq ki, hazırda İtaliya A Seriyasının yarış cədvəlinə 12 oyunda 27 xal toplamış “Roma” başaçılıq edir. “Milan” və “Napoli”nin 25, 4-cü olan “İnter”in isə 24 xalı var.