"Bu gün dünyada insanların mediaya etimadı, inamı azalıb".
Musavat.com xəbər verir ki, bunu Medianın İnkişafı Agentliyinin (MEDİA) icraçı direktorunun müavini Natiq Məmmədli Türk Dövlətləri Təşkilatının Media Forumu çərçivəsində baş tutan "Müasir dövrdə artan qlobal informasiya təhdidlərinə qarşı dayanıqlı və preventiv addımlar: Türk dövlətlərinin media ekosistemi nümunəsində" mövzusuna həsr olunan panel sessiyada çıxışı zamanı deyib.
O bildirib ki, media yarandığı gündən təhdid və təqiblərlə birgə formalaşıb:
"İnformasiya bolluğu insanlara lazım olan məlumatı seçməkdə çətinlik yaradır. Bu, medianın işinə də əngəl törədir. Azərbaycan dövlətinin nümunəsinə baxdıqda son illər ölkəmizin informasiya məkanına artan təhdidlərin qarşısını almaq üçün hüquqi işlər tam yekunlaşıb. Qəbul olunan yeni "Media haqqında" Qanun hüquqi qalxan rolunu oynayır. İnsanların texnoloji bilikləri və media savadlılığı artdıqca cəmiyyətin bu informasiyaların altına düşməsinin qarşısını alır.
MEDİA olaraq gələn həftə "Media savadlılığı" həftəsinə start verəcəyik. Media ictimai etimadı qazanmalıdır. Bu gün dünyada insanlar mediaya inamı sarsılıb. Bunu bərpa etmək üçün öncəliklə media öz funksiyalarını düzgün yerinə yetirməli və yeniliklərə açıq olmalıdır.
Biz süni intellekti rəqib kimi götürürüksə, bu, məğlubiyyətdir. Mən "ChatGPT" ilə fikir mübadiləsi aparıram və o, daha çox insanların bəyəndiyi fikirləri göstərir. Media isə daha rəngarəngdir və bəzən sənin istəmədiyini göstərir. Buna görə də daim texnoloji yeniliklərə açıq olmalı və bunu işimizdə tətbiq etməliyik".
