“Liverpul” 72 il idi belə aqibətlə üzləşmirdi

2025/2026-cı illər mövsümündə uğursuz çıxışı ilə diqqət mərkəzində olan “Liverpul” ötən gecə daha bir ağır məğlubiyyətlə üzləşdi.

Arena.az xəbər verir ki, İngiltərə çempionu UEFA Çempionlar Liqasının Liqa mərhələsinin 5-ci turunda öz meydanında PSV-yə (Niderland) böyük hesabla uduzub – 1:4.

Mersisayd təmsilçisi ardıcıl üçüncü rəsmi oyununda 3 və daha çox qol buraxmaqla uduzur. Arne Slotun komandası əvvəlki iki oyunda “Nottingem Forest” və “Mançester Siti”yə də 0:3 hesabı ilə məğlub olmuşdu.

Mersisayd klubu bu nəticələrdən sonra 72 il əvvəlki antirekordunu təkrarlayıb. “Qırmızılar” 1953-cü ilin dekabrında belə uğursuzluq yaşamışdılar.

Xatırladaq ki, “Liverpul” hazırda 18 xalla İngiltərə çempionatının yarış cədvəlinin 12-ci pilləsində qərarlaşıb. Komanda keçirdiyi 12 oyunda 6 qələbə qazanıb, 6 məğlubiyyətə üzülüb. UEFA Çempionlar Liqasının Liqa mərhələsində isə bu komanda 5 oyuna 3 qələbə qazanıb, 2 məğlubiyyət alıb və hazırda 9 xalla 13-cüdür.