Kilian Mbappe Çempionlar Liqasında yeni rekorda imza atdı

“Real”ın hücumçusu Kilian Mbappe UEFA Çempionlar Liqası (ÇL) tarixində digər oyunçulardan daha çox səfər oyunlarında het-trik edib.

Arena.az xəbər verir ki, fransalı hücumçu UEFA Çempionlar Liqasının Liqa mərhələsinin 5-ci turunda “Olimpiakos” üzərində 4:3 hesablı qələbə qazandıqları oyunda 4 qol vurub.

Mbappe hazırkı turnirdə 9 qol vuraraq özünün ÇL qol rekordunu yeniləyib. Onun Çempionlar Liqasındakı əvvəlki ən yüksək qol sayı 8 olub: bu, 2020/2021 mövsümündə və PSJ-də oynadığı 2023/2024 mövsümündə baş verib.

“Real” hazırda ÇL-in Liqa mərhələsinin turnir cədvəlində 12 xalla 5-ci yerdədir. Komanda növbəti turda “Mançester Siti” ilə qarşılaşacaq.

Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib. 2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyul ayında 180 milyon avro məbləğ müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə fərqlənib. Vurduğu 256 qolla Kilian PSJ tarixinin ən sərrast futbolçusudur.

Kilian Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.

Mbappe cari mövsümdə “Real”ın heyətində 18 oyuna çıxıb, 22 qol vurub, 3 məhsuldar ötürmə verib. Fransalı futbolçunun Madrid klubunun heyətində ümumi statistikası isə belədir: 77 oyun, 66 qol, 8 məhsuldar ötürmə.

Kilian Mbappe hazırda kapitanı olduğu, 2017-ci ilin mart ayında debüt etdiyi Fransa yığmasının heyətində 94 oyun keçirib, 55 qol vurub və 40 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.

“Transfermarkt” internet-portalı 26 yaşlı fransalı hücumçunun transfer dəyərini 180 milyon avro məbləğində qiymətləndirir.