Türkiyə superkuboku bu mövsüm fərqli formatda keçiriləcək.
"Football-plus.az" xəbər verir ki, bu turnir ilk dəfə 4 komandanın iştirakı ilə oynanılacaq.
Belə ki, yeni formata əsasən bir yarımfinalda superliqanın son çempionu ilə kubokun son finalçısı, digər yarımfinalda isə superliqanı 2-ci pillədə tamamlayan kollektivlə kubokun qalibi qarşılaşmalıdı. Amma ötən mövsüm “Qalatasaray” həm çempion olduğundan, həm də kuboku qazandığından, bu dəfə bu turnirdə superliqanı 3-cü pillədə tamamlamış “Samsunspor” da iştirak edəcək. Oyunlar neytral meydanda keçiriləcək və qalib bir oyunla müəyyənləşəcək.
Beləliklə, Türkiyə Futbol Federasiyası tərəfindən oyunların təqvimi və məkanı açıqlandı. Yanvarın 5-də keçiriləcək ilk yarımfinalda “Qalatasaray” ilə “Trabzonspor” üz-üzə gələcək. Bu qarşılaşmaya “Qaziantep Stadionu” evsahibliyi edəcək. Yanvarın 6-da isə Adanada yerləşən “Yeni Adana Stadionu”nda “Fənərbaxça” ilə “Samsunspor” üz-üzə gələcək. Qaliblər finala vəsiqə qazanacaq.
Həlledici oyun isə yanvarın 10-da “Atatürk Olimpiya” stadionunda keçiriləcək.
