Amerikalı rəsmilər Cenevrədəki ABŞ–Ukrayna danışıqlarından sonra yaranan yeni şərtlərə Putinin göstərəcəyi şərtlərdən narahatdırlar…
Poliqon xəbər verir ki, Bu barədə The New York Times qəzeti Tramp administrasiyası daxilindəki bir sıra ABŞ rəsmilərinə istinadən məlumat yayıb.
Nəşr yazır ki, Cenevrədə amerikalı və ukrainalı nümayəndələrin görüşündən sonra Tramp administrasiyasının sülh təşəbbüsünə əlavə olunmuş dəyişikliklər Rusiya prezidenti Vladimir Putinin həmin planı dərhal rədd etməsinə gətirib çıxara bilər. Məlumata görə, Vaşinqtonun təklif etdiyi sənəddə Ukraynanın maraqlarını nəzərə alan bəzi yeni bəndlər Moskvanın qəti etirazına səbəb ola bilər.
Mənbələrin bildirdiyinə görə, ABŞ və Ukrayna nümayəndələrinin son görüşü sənədin bir sıra maddələrinin yumşaldılması və bəzi “qırmızı xəttlərə” aid maddələrin çıxarılması ilə nəticələnib. Xüsusilə Ukraynanın NATO-ya qəbulunun qadağan edilməməsi və Rusiyanın nəzarəti altında olmayan ərazilərin Moskvaya verilməsi barədə müddəanın plana daxil edilməməsi Kreml üçün ciddi narahatlıq yaradan məqamlar kimi qeyd edilir.
Administrasiya daxilindəki bəzi səlahiyyətlilər bu dəyişikliklərin Putini planı “müzakirəsiz rədd etməyə” sövq edə biləcəyini deyirlər. Onların fikrincə, 28 maddəlik ilkin layihənin ən vacib komponentləri məhz Moskva üçün strateji üstünlük hesab edilən şərtlərə əsaslanırdı və bu şərtlərin zəiflədilməsi Kremlin maraqlarına uyğun deyil.
NYT yazır ki, Tramp administrasiyası indi həm Ukraynanın, həm də Rusiyanın minimal qəbul edə biləcəyi kompromisin tapılması üçün təzyiq altında qalıb. ABŞ rəsmiləri qeyd edirlər ki, sənədin son versiyası üzərində müzakirələr hələ davam edir və Vaşinqton Moskvanın reaksiyasını nəzərə alaraq yeni diplomatik gedişlər etməyə hazırdır.
Analitiklər hesab edir ki, əgər Putin dəyişdirilmiş planı rədd edərsə, bu, Vaşinqtonun təqdim etdiyi təşəbbüsün siyasi gələcəyinə ciddi zərbə vuracaq və danışıqlarda yeni mərhələ açacaq. Bununla belə, amerikalı rəsmilər hələ də kompromis əldə olunacağına ümid etdiklərini bildirirlər.
Poliqon.info
