Bakı, 25 noyabr, AZƏRTAC
Azərbaycan və Mərkəzi Asiya dövlətləri arasında iqtisadi əməkdaşlığın genişləndirilməsi üçün əhəmiyyətli potensial mövcuddur. İnvestisiyaların artırılması və pul kütləsinin genişləndirilməsi üçün böyük imkanlar var. Bundan başqa, nəqliyyat-logistika arteriyaları ilə bağlı mövcud imkanlar mövcuddur. Məlum olduğu kimi, Azərbaycan nəqliyyat-logistika dəhlizləri və marşrutlarına çox fəal və effektiv sərmayə qoyub və sərmayələr davam etməkdədir. Bu da gələcəkdə Azərbaycanla Mərkəzi Asiya dövlətləri arasında əməkdaşlıq üçün müvafiq iqtisadi dividendlər yaradacaq.
Bu fikirləri AZƏRTAC-a iqtisadçı ekspert Elşad Məmmədov bildirib.
Ekspertin sözlərinə görə, həm ənənəvi, həm də alternativ energetika sahəsində qarşılıqlı faydalı əməkdaşlıq üçün böyük potensial mövcuddur və bu sahələrdə ciddi inkişaf imkanları (böyümə potensialı) var.
“Kənd təsərrüfatında, xüsusilə emal seqmentlərində, eləcə də dərin emalın prioritet olduğu sənaye sahəsində və ümumi satış bazarlarının formalaşdırılması istiqamətində də geniş əməkdaşlıq imkanları mövcuddur. Ümumilikdə hesab edirəm ki, prioritet yüksək texnoloji istiqamətlər olmalıdır. Çünki məhz bu sahələr həm Mərkəzi Asiya dövlətlərinə, həm də Azərbaycana ciddi rəqabət üstünlüyü verəcək”, – deyə Elşad Məmmədov bildirib.
İqtisadçı hesab edir ki, humanitar sahədə əməkdaşlığın dərinləşdirilməsi də Mərkəzi Asiya dövlətləri ilə Azərbaycan arasında münasibətlərin inkişafında çox vacib istiqamətlərdən biri olaraq qalır.
