Pekin, 25 noyabr, AZƏRTAC
ABŞ hərbi hava qüvvələrinə məxsus “MQ-9 Reaper” pilotsuz uçuş aparatı (PUA) Cənubi Koreyanın qərb sahillləri yaxınlığında qəzaya uğrayaraq suya düşüb.
AZƏRTAC Yonhap agentliyinə istinadla xəbər verir ki, rutin uçuşu yerinə yetirən PUA ABŞ-ın Cənubi Koreyanın Kunsan şəhərindəki hərbi bazasında qeydiyyatda olub. Hərbi bazadan verilən açıqlamaya görə, uçuş zamanı səhər 4:35-də PUA-da insident baş verib. Hazırda qəza yerində PUA-nın qalıqlarının axtarışları aparılır.
Qeyd edək ki, ABŞ sentyabrda Kunsan hərbi bazasında PUA-ların cəlb olunduğu kəşfiyyat bölməsi yaradıb. Kəşfiyyat tapşırıqlarını yerinə yetirməyə qadir olan “Reaper” aparatalarının uçuş məsafəsi təxminən 1850 kilometrdir.
AZƏRTAC-ın xüsusi müxbiri
Pekin