Ali Məhkəmədə soyğunçuluqda ittiham olunan Vüqar Məmmədov və 1992-ci il təvəllüdlü Ceyhun Bəylərovun barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 7 dekabr 2023-cü il tarixdə, saat 23:50 radələrində paytaxtın Yasamal rayonu ərazisində qeydə alınıb.
Belə ki, Vüqar Məmmədov və Ceyhun Bəylərov rayon ərazisində tanımadığı şəxsin 200 manat dəyərindəki mobil telefonunu soyğunçuluq yolu ilə ələ keçiriblər.
Yasamal Rayon Polis İdarəsinin 29-cu Polis Şöbəsinin əməkdaşları tərəfindən həyata keçirilən əməliyyat-axtarış tədbirləri nəticəsində hadisəni törətməkdə şübhəli bilinən, əvvəllər məhkum olunmuş Sumqayıt şəhər sakinləri - 2001-ci il təvəllüdlü Vüqar Məmmədov və 1992-ci il təvəllüdlü Ceyhun Bəylərov saxlanılıblar.
Soyğunçuluq edən şəxslərin qanunsuz hərəkətləri əraziyə quraşdırılan kameralar vasitəsi ilə də qeydə alınıb.
Yasamal Rayon Məhkəməsinin hökmü ilə onlar 4 il 9 ay müddətinə azadlıqdan məhrum edilib.
Kamal Məmmədov
