"AFEN Palaza"da baş verən partlayışın səbəbi ilə bağlı araşdırma davam edir və əsas səbəbin binaya qaz sızması olduğu ehtimal edilir.
Plazanın sahibi Əbülfət Əliyev mətbuata açıqlama verərək, bildirdi ki, Plazada ümumiyyətlə qaz yoxdur.
Onun sözlərinə görə, qaz sızmasına binanın qarşısından keçən yolda təmir işləri aparılarkən qaz borusunun zədələnməsi səbəb ola bilər: "Binanın qarşısından keçən yolda təmir işləri aparırdılar. Ola bilsin, qaz xəttini zədələyiblər. Altdan binaya sızma baş verib. Bu yolda magistral qaz xəttini 300-lük böyük plasmas boru ilə çəkiblər. İş aparan zaman traktorla həmin xətti zədələdilər. Sonra dedilər ki, o xətti yamadıq, düzəltdik. Görünür, yamaq düzgün vurulmayıb deyə qaz sızması baş verib və zirzəmiyə dolub. İşçi gələn zaman da partlayıb. Bu səhər də detektorla yoxladılar, torpaqların altından qaz sızması var. Hazırda durduğunuz torpağın altında qaz sızması var. Siz də təhlükədəsəiniz"
Sitat.info olaraq məsələ ilə bağlı AAYDA-nın mətbuat katibi Anar Nəcəfli əlaqə saxladıq. A.Nəcəfli bildirdi ki, məsələ araşdırıldıqdan sonra dəqiq səbəb bəlli olacaq: "Həmin ərazidə bizim agentliyin sifarişi ilə Həsən Əliyev - Koroğlu layihəsi icra olunur. İş hissədə aparılır. Lakin hadisənın baş vermə səbəbi aparılan işlərdir, ya başqa bir məsələdir - bu müvafiq qurumlar tərəfindən aparılan araşdırmalardan sonra bəlli olacaq".
Azəriqaz" sözçüsü Eldəniz Vəliyev də bildirdi ki, Bakıda binada baş verən partlayışın dəqiq səbəbləri istintaqın yekununda bəlli olacaq. "Əməkdaşlar "Azəriqaz"a məxsus boru xətlərinin təftişi ilə məşğuldurlar. Əraziyə qazın verilişi təmin olunmayıb. Ətrafdan gedən boru xətlərində nasazlıq yaranması kimi iddialar səsləndirilir. Düşünürəm ki, bu kimi iddiaların səsləndirilməsi hələ tezdir. Hüquq-mühafizə orqanları araşdırma aparır və dəqiq cavab istintaqın yekununda bəlli olacaq".
Tehran,
Sitat.info
